„На светот денеска му недостига идеализам, а кога велам идеализам не мислам на утопија, туку на право, на правда, на морал, на етика.“ Така претседателката Гордана Сиљановска-Давкова им се обрати на членките на Советот за женско претприемништво во Битола, тело формирано од Општината. Продолжи и поостро: „Секој ден нè убедуваат во реалната политика, но последиците се дарвинизам.“ Тоа, рече, е срамно за човештвото, затоа што гревот не се прави само со чинење, туку и со нечинење, со гледање – и утре некој ќе праша каде бевте кога овие нешта се случуваа.

Претседателката зборуваше за војните, за разочараните луѓе што „одат во потрага по среќа низ светот“ и за потребата повеќе простор да добие културната дипломатија – „поплодна, посилна и почовечка од традиционалната“. Мировната и превентивната дипломатија, рече, се подобри од реактивната. Ниту една од тие реченици не е спорна. Проблемот со реченици што не се спорни е што често остануваат само реченици.

Локалниот дел од средбата беше поконкретен. Градоначалникот Тони Коњановски, заменичката Марина Крстиќ и претседателот на Советот Бојан Бојкоски, мал саем во ресторан со производи на жени од заедницата, порака дека знаењето и меѓусебната поддршка се патот до успех. „Успехот не се мери само со постигнатото, туку и со начинот на кој ги инспирираме другите“, порача Коњановски.

Претседателката е во право: грев се прави и со нечинење. Тоа е реченица што секоја институција во оваа држава може да ја закачи над вратата – од министерство до општински шалтер. За жените што своите производи ги продаваат на мал саем во ресторан, идеализмот е добра тема за средба. Подобра тема би била: што конкретно Општината и државата ќе направат за нив откако ќе се фотографираат?