Премиерот Христијан Мицкоски во телевизиско интервју од Њујорк повтори дека Македонија сака Европската Унија да биде присутна во разговорите со Бугарија. Причината, според него, е едноставна: досегашните билатерални средби не донеле ништо суштинско.

„Досегашните средби на билатерално ниво коишто ги имаше и претседателката, но и министерот за надворешни работи и надворешна трговија, се средби коишто јас ги викам средби колку да се случат средби“, рече Мицкоски. По секоја таква средба, додаде тој, следува брифирање „секогаш со сосема различна вистина“ од она што е разговарано на состанокот.

Тука е суштината. Софија, според Мицкоски, не сака трета страна на масата затоа што тоа би значело признание дека спор навистина постои. „И навистина ние имаме билатерален спор. Ние можеме да измислуваме, да се правиме дека немаме, ние во суштина навистина имаме билатерален спор којшто е сега на својот почеток“, рече премиерот.

„Најмалку 80 пати“

Најконкретниот дел од интервјуто е аритметиката. Ако утре се отворат преговорите, секое поглавје и секој кластер при затворање ќе мора да помине низ гласање во националните парламенти на земјите членки. „Тоа е најмалку 80 пати можност ние повторно да добиеме нови барања“, рече Мицкоски. Сценариото што го опиша е познато за секој што ги следел последниве години: порадикална структура во бугарскиот парламент, а потоа мејнстрим политичари што ќе кажат дека „поради домашни проблеми“ мораат повторно да блокираат. „Јас во тој процес нема да влезам“, порача тој.

Позицијата на Владата, според премиерот, е дека нема да влезе во „било каква авантура“ без да го види крајот на патот. Владата, вели, има предлози како процесот да се надмине заедно со Бугарија, со која сме партнери во НАТО. „Ако таму сме партнери во тоа семејство, логиката вели дека и тука треба да сме партнери.“

Одговорот од Софија

Бугарија го соопшти својот став уште на 25 септември, по изјавите на министерот за надворешни работи Тимчо Муцунски дека ЕУ треба да учествува во сите идни разговори. Бугарското Министерство за надворешни работи порача дека Софија „отсекогаш била и останува отворена за конструктивен дијалог“, но дека напредокот кон ЕУ зависи од исполнувањето на преземените обврски и од добрососедските односи. Пристапувањето, според Софија, е европско прашање што се решава во европските институции.

Преведено: дијалог може, посредник не, а обврските од преговарачката рамка остануваат на масата. Двете страни се разминуваат токму таму каде што удри Мицкоски – дали ова е европско прашање или билатерален спор облечен во европски правила.

Ако спорот не е билатерален, зошто се решава само меѓу Скопје и Софија? А ако е европско прашање, зошто Брисел не смее да седне на масата? На тоа Софија засега не одговара.