Меѓународната агенција за кредитен рејтинг „Стандард и Пурс“ го потврди кредитниот рејтинг на Македонија ББ-, со стабилни изгледи. Министерството за финансии веста ја објави во сабота, со наслов во кој се истакнуваат јавните инвестиции и домашната побарувачка како двигатели на растот. Тоа е вистина. Но тоа е половина од извештајот.

Агенцијата очекува економски раст од околу 3,6 отсто во 2026 и 2027 година, а потоа просечно околу 3,3 отсто годишно во периодот 2027-2029. Главен погон се големите инфраструктурни проекти, пред сè Коридорите 8 и 10д, благодарение на кои инвестициите во првата половина од 2026 година пораснале за над 9 отсто. Растот го држи и домашната потрошувачка – повисоките плати и пензии и подобриот пазар на трудот. И сето тоа, според агенцијата, и покрај прелевањата од војната на Блискиот Исток преку поскапата енергија.

Другата половина е долгот. Високите јавни инвестиции, финансирањето на инфраструктурните проекти и обврските поврзани со државните претпријатија ќе го туркаат јавниот долг до околу 57 отсто од БДП до 2029 година. Буџетскиот дефицит, и покрај очекуваната постепена фискална консолидација, во периодот 2027-2029 во просек би изнесувал околу 3,4 отсто од БДП. Трошоците за сервисирање на долгот агенцијата ги оценува како одржливи.

Пристапот до пазарите засега не е проблем – во јануари државата издаде две еврообврзници од по 500 милиони евра. Но условите за подобар рејтинг се напишани црно на бело: трајно подобрување на буџетските резултати, одржливо намалување на нето јавниот долг и посилен економски раст. Ниту еден од тие услови не се исполнува со сечење лента на автопат.

Рејтингот е добар сигнал за инвеститорите и не е мала работа што останува стабилен во година на енергетски шокови. Но кога растот се гради со задолжување, вистинската проверка не доаѓа на отворањето на патот, туку кога ќе треба да се врати кредитот. Дали коридорите ќе донесат доволно економија за да го исплатат долгот со кој се градат?