Вучиќ го призна поразот: Студентската листа зема мнозинство во српското Собрание

Во 21:30 часот, од штабот на СНС во Нови Белград, Александар Вучиќ изговори реченица што малкумина очекуваа да ја слушнат од него: „Јасно е дека ние овие избори ги изгубивме.“ Според примерокот на неговата листа, Студентската листа ќе има меѓу 135 и 140 пратеници во Собранието од 250 места. „Александар Вучиќ – Обединета Србија“ – околу 105.

Бројките ги кажа сам. Околу 1.720.000 гласа за неговата листа, околу 2.200.000 за студентите. Независната проекција на ЦеСИД и Ипсос е уште поостра: Студентската листа 52,9 отсто, Вучиќ 38,8. Право на глас имаа 6.451.292 граѓани, на 18 листи се натпреваруваа 2.418 кандидати, а излезноста до 19 часот, според Ипсос, беше 67,7 отсто. За споредба, на изборите во 2023 година СНС освои 46,75 отсто и 129 пратенички места.

Во Собранието, според Вучиќ, влегуваат уште Сојузот на војводинските Унгарци со три мандати и по еден мандат за Албанците и, како што рече, „мислам СДА“. И веднаш додаде: „Не ме држете за збор.“

Признание и закана во ист здив

Говорот не беше смирен. Вучиќ ѝ честиташе на Наташа Кандиќ, тврдејќи дека „нејзината политика победила“ и тоа „со огромна надворешна поддршка“. Новинарите на N1 и Нова С ги нарече „олош“. Најави дека чека да го гонат за „звучниот топ“, обвинување кое тој го нарекува измислица.

Истовремено, ветува дека нема да има жалби, приговори ниту блокада на верификацијата на мандатите. „Нека го сметаат ова за признати резултати на изборите“, рече тој, додавајќи дека новото мнозинство може да го конституира Собранието за 10 до 15 дена и да формира влада „каква што сака“. Потоа ја кажа реченицата што вреди да се запамети: „Ќе го победиме ова зло побрзо отколку што тие мислат.“ Ова не звучеше како збогување.

Изборниот ден не беше празник

МВР соопшти дека во Лазаревац, пред просториите на СНС, група луѓе со камења и пиротехника нападнала полиција, при што биле повредени двајца полицајци. Претседателот на Републичката изборна комисија, Владимир Димитријевиќ, пријави дека во Младеновац непознати лица упаднале во геронтолошки центар, кој е и гласачко место, и вршеле притисок врз неподвижни корисници. Провладината страна пак тврдеше дека во Врачар била нападната мајката на Вучиќ, Ангелина. Секоја страна броеше свои инциденти – а гласачите си ја кажаа својата.

Што гледа регионот

Интересно е каде листата на Вучиќ остана непоместена. Во Куманово, според објавените резултати, неговата листа доби 487 гласа, а студентите 35. Во Бијелина 1.543 наспроти 335. Србите надвор од Србија останаа со Вучиќ – Србија не.

Самиот Вучиќ најави дека ќе има „промени во односот кон Република Српска и кон Сараево“. Еврокомесарката за проширување Марта Кос веќе им честиташе на студентите со порака дека „за Србија може да почне ново поглавје“, а честитка испрати и црногорскиот премиер Милојко Спајиќ. Вучиќ, од своја страна, предупреди дека до март или април Србија ќе воведе санкции против Русија.

За Македонија прашањето е практично. Вучиќ беше еден од тројцата лидери што го туркаа „Отворен Балкан“ заедно со Скопје и Тирана. Дали новата власт во Белград ќе ја задржи иницијативата – или таа заминува заедно со човекот што ја правеше своја?

Студентите ја добија улицата, а сега и Собранието. Но апаратот што се градеше повеќе од една деценија не исчезнува за една вечер, а неговиот творец веќе вечерва порача: „Од вечерва одиме во подготовки.“ Колку брзо една победничка листа станува власт – и дали ќе остане иста кога ќе ги преземе институциите?