Пари закопани во шума: Унгарија заплени 17,5 милиони евра во истрагата за поранешен Орбанов министер

Истражителите копаа ноќе, во шума, со лопати. Она што го извадија од земја, од земјоделски објекти, магацини, станбен имот и скапоцен сеф на скриена локација, изнесува околу 17,5 милиони евра готовина. Унгарските власти соопштија дека парите се пронајдени во истрагата против Миклош Сестак, поранешен министер за национален развој во владата на Виктор Орбан.

Составот на пленот е речиси банкарски: повеќе од пет милијарди форинти, околу 2,6 милиони евра и 1,2 милиони долари. Претресите траеле два дена, во Будимпешта и во три унгарски округа. Кога парите биле предадени, 12 вработени во Државниот трезор ги броеле осум часа, со пет машини за броење банкноти. Снимката на која истражителите клечат покрај купишта завиткани банкноти, а лопатите копаат во темнината, ја објави самата институција.

Сестак е осомничен дека примил повеќе од 33 милиони евра поткуп и незаконски провизии поврзани со набавката на возила за државната автобуска компанија и со државни градежни проекти. Приведен е кон крајот на септември. Истрагата ја води Националната канцеларија за враќање и заштита на имот – тело што новата влада го формираше неодамна, со истражни овластувања и право на кривично гонење во случаи на злоупотреба на јавни пари.

„Од денес Орбан е докажан мафијашки шеф“

Премиерот Петер Маѓар, чија партија Тиса го победи Фидес на априлските избори, не чекаше суд за да изрече пресуда. „Од денес Виктор Орбан е докажан мафијашки шеф. Паднат мафијашки шеф. А Фидес е криминална организација“, напиша тој на Facebook. Силни зборови од премиер – а Сестак засега е осомничен, не осуден. Заплената е факт; „докажан“ е политички збор, и тоа треба да се каже гласно.

Пленот во шумата не е единствениот потег на новата власт. Во понеделникот полицијата го приведе помладиот брат на Орбан, во истрага за сомнеж за трговија со луѓе и трговија со влијание. Во притвор е и поранешниот гувернер на централната банка Ѓерѓ Матолчи, поради сомнежи за злоупотреба на фондацијата на централната банка, на која ѝ биле доделени 288 милијарди форинти, околу 740 милиони евра јавни пари. Орбан, по 16 години на власт, сите истраги ги нарекува политичка „тиранија“ чија цел е да го отстранат од политичката сцена.

Будимпешта не е далеку од Скопје

За македонскиот читател Орбан не е странец. Неговата Унгарија беше земјата што во 2018 година му даде азил на Никола Груевски, откако тој избега од затворска казна во Македонија. Сега новата влада во Будимпешта ги вади од земја парите на Орбановите министри и ги брои со машини, пред камери. Колку пати на Балканот сме го слушнале ветувањето „ќе има затвори“ по промена на власта – и колку пати некој навистина фатил лопата?

Следниот чекор е судницата. Таму ќе се види дали 17,5 милиони евра закопани во шума ќе станат пресуда, или ќе останат најгледаната снимка на унгарскиот Facebook.