Të shtunën, rreth orës 22:10, në kryqëzimin e rrugëve „Kej Vardar“ dhe „Tode Bogdanovski“ në Gostivar u përplasën tre makina në lëvizje, ndërsa goditje mori edhe një automjet i parkuar. Në aksident ishin përfshirë dy „golfa“, të drejtuar nga 18-vjeçari E.R. dhe 19-vjeçari B.A., si dhe një „bmw“ i drejtuar nga 25-vjeçari M.M. „Pasati“ i parkuar është pronë e 54-vjeçarit E.S. Të gjithë janë nga Gostivari.

Më së rëndi pësuan dy pasagjerë vetëm 14 vjeç. Pas ndihmës së parë në Qendrën Urgjente në Gostivar, për shkak të rëndësisë së lëndimeve ata u dërguan për mjekim në Klinikat „Nënë Tereza“ në Shkup. Lëndime morën edhe të dy shoferët e „golfave“, si dhe pasagjerët A.S. dhe B.L. Gjithsej gjashtë të lënduar, prej tyre katër adoleshentë.

Këqyrjen në vendngjarje e kreu një ekip i SPB Gostivar, i cili po përcakton rrethanat dhe shkaqet e aksidentit. Deri tani nuk është thënë me çfarë shpejtësie lëvizej, as kush e shkaktoi përplasjen.

Tani më e rëndësishmja është që dy fëmijët të shërohen. E pastaj policia duhet të thotë publikisht çfarë ndodhi në atë kryqëzim - që lajmi të mos përfundojë si edhe një rresht në buletinin ditor, deri të shtunën e ardhshme në mbrëmje.