Agjencia ndërkombëtare për reiting kreditor „Standard & Poor's“ e konfirmoi reitingun kreditor të Maqedonisë BB-, me perspektivë të qëndrueshme. Ministria e Financave e publikoi lajmin të shtunën, me titull ku theksohen investimet publike dhe kërkesa e brendshme si nxitëse të rritjes. Kjo është e vërtetë. Por është gjysma e raportit.

Agjencia pret rritje ekonomike prej rreth 3,6 për qind në vitet 2026 dhe 2027, e më pas mesatarisht rreth 3,3 për qind në vit në periudhën 2027-2029. Motori kryesor janë projektet e mëdha infrastrukturore, para së gjithash Korridoret 8 dhe 10d, falë të cilëve investimet në gjysmën e parë të vitit 2026 u rritën mbi 9 për qind. Rritjen e mban edhe konsumi i brendshëm - pagat dhe pensionet më të larta dhe tregu më i mirë i punës. Dhe e gjithë kjo, sipas agjencisë, pavarësisht efekteve të luftës në Lindjen e Mesme përmes energjisë më të shtrenjtë.

Gjysma tjetër është borxhi. Investimet e larta publike, financimi i projekteve infrastrukturore dhe detyrimet e lidhura me ndërmarrjet shtetërore do ta shtyjnë borxhin publik deri në rreth 57 për qind të BPV-së deri në vitin 2029. Deficiti buxhetor, pavarësisht konsolidimit gradual fiskal të pritur, në periudhën 2027-2029 mesatarisht do të ishte rreth 3,4 për qind e BPV-së. Shpenzimet për shërbimin e borxhit agjencia i vlerëson si të qëndrueshme.

Qasja në tregje për momentin nuk është problem - në janar shteti emetoi dy euroobligacione nga 500 milionë euro secili. Por kushtet për reiting më të mirë janë shkruar bardh e zi: përmirësim i qëndrueshëm i rezultateve buxhetore, ulje e qëndrueshme e borxhit neto publik dhe rritje më e fortë ekonomike. Asnjë nga këto kushte nuk plotësohet duke prerë shiritin e një autostrade.

Reitingu është sinjal i mirë për investitorët dhe nuk është gjë e vogël që mbetet i qëndrueshëm në një vit goditjesh energjetike. Por kur rritja ndërtohet me borxh, provimi i vërtetë nuk vjen në hapjen e rrugës, por kur duhet të kthehet kredia. A do të sjellin korridoret mjaftueshëm ekonomi për ta paguar borxhin me të cilin ndërtohen?