Dakota Johnson më 4 tetor mbushi 37 vjeç, ndërsa një fjali e saj qarkullon më gjatë se çdo film i saj: se mund të flinte 14 orë në ditë. Ajo më vonë sqaroi se nuk fle aq çdo ditë, por se „lehtë do të mundte“. Në emisionin e Jimmy Fallon bëri shaka: „Më pëlqen të fle, pse është kjo keq?“ Për WSJ Magazine tha se gjumi është „prioriteti numër një në jetë“ dhe se nuk funksionon nëse fle më pak se 10 orë.

Deklarata shpejt u bë „sekret bukurie“. Ekspertet e lëkurës janë më skeptike. María Ángeles de Broto, kozmetologe dhe themeluese e një marke kozmetike, konfirmon se lëkura vërtet punon natën: „Ndërsa flemë, lëkura hyn në një fazë veçanërisht të rëndësishme rinovimi dhe riparimi.“ Nata është momenti kur lëkura e rikthen ekuilibrin, ndërsa gjumi i keq, nëse përsëritet, e dëmton barrierën mbrojtëse të saj dhe në fytyrë shihen shenja lodhjeje dhe mungesë shkëlqimi.

Por më shumë nuk do të thotë më mirë. Gjumi, thotë ajo, nuk vepron „drejtpërdrejt në përpjesëtim“, kështu që orët shtesë nuk garantojnë dobi shtesë. Rekomandimi për të rriturit është 7 deri në 9 orë gjumë në natë, dhe „po aq të rëndësishme sa sasia janë cilësia dhe rregullsia e pushimit“. Përfundimi i saj është i qartë: „Gjumi 14-orësh mund të jetë prirje personale, por nuk do ta rekomandonim si trajtim bukurie.“

Ana tjetër është shumë më e pakëndshme. Dr. Sofía Ruiz del Cueto, eksperte e mjekësisë estetike, shpjegon se pagjumësia sjell tepricë kortizoli dhe ulje të sinjaleve biologjike për rinovim. Ndryshimet në lëkurë, sipas saj, janë të ngjashme me ato që i shkakton duhani: mbetjet nxirren dobët, ndërsa fijet që nuk rinovohen grumbullohen.

Çfarë ndihmon në të vërtetë? Ekspertet rekomandojnë rregullin 10-3-2-1: pa kafeinë dhjetë orë para gjumit, pa ushqim dhe alkool tri orë para, pa punë dy orë para dhe pa ekran në orën e fundit. Darka të jetë dy deri në tri orë para shtrimit, ndërsa telefoni më larg shtratit.

Johnson mund t'i flejë dhjetë orët e saj. Për shumicën e njerëzve që zilja i ngre në gjashtë, sekreti i vërtetë për lëkurën nuk janë 14 orë, por shtatë deri në nëntë, rregullisht, pa shfletuar deri në mesnatë. Sa prej nesh orën e fundit para gjumit e kalojnë me telefon në dorë, e në mëngjes kërkojnë një krem që do ta rregullojë këtë?