Armëpushimi i shkurtër i Pashkëve mes Rusisë dhe Ukrainës, i njoftuar nga presidenti rus Vladimir Putin dhe i pranuar nga presidenti ukrainas Volodimir Zelensky, hyn në fuqi sot pasdite. Kremlini njoftoi se ndërprerja e zjarrit fillon në orën 16:00 me kohën e Moskës dhe do të zgjasë 32 orë.

Ministri rus i Mbrojtjes Andrej Belousov dhe Shefi i Shtabit të Përgjithshëm Valerij Gerasimov morën urdhër të ndërpresin operacionet luftarake në të gjitha drejtimet për kohëzgjatjen e armëpushimit. Presidenti ukrainas Zelensky konfirmoi se vendi i tij është i gatshëm të respektojë këtë pauzë të rrallë në armiqësitë.

"Ndërprerja e zjarrit në Pashkë mund të bëhet fillimi i një lëvizjeje të vërtetë drejt paqes", deklaroi Zelensky, duke shtuar se çdo mundësi për të ulur dhunën duhet shfrytëzuar.

Një armëpushim i ngjashëm u shpall edhe vitin e kaluar, gjithashtu për Pashkën ortodokse, por të dyja palët akuzuan njëra-tjetrën për shkelje të shumëfishta. Pauza e këtij viti vjen në një moment kur negociatat për t'i dhënë fund konfliktit katërvjeçar janë në ngërç.

Disa raunde bisedimesh të sponsorizuara nga Shtetet e Bashkuara të Amerikës nuk arritën t'i afrojnë palët luftarake drejt një marrëveshjeje. Procesi u ngadalësua edhe më shumë pasi vëmendja e Uashingtonit u zhvendos drejt situatës në Lindjen e Mesme.

Zëdhënësi i Kremlinit Dmitri Peskov theksoi se njoftimi i këtij armëpushimi të shkurtër nuk është i lidhur drejtpërdrejt me negociatat për zgjidhjen e përhershme të konfliktit. Megjithatë, shefi i kabinetit të Zelenskyt shprehu optimizëm se ka përparim, duke theksuar se "të gjithë e kuptojnë se lufta duhet të mbarojë."