„Glass skin“ koreane - lëkurë e lëmuar dhe gati e tejdukshme, si qelqi - për vite me radhë ishte grali i shenjtë i industrisë së bukurisë. Aq e popullarizuar sa nga fytyra kaloi edhe te flokët, në trendin e flokëve me efekt pasqyre. Por froni po lëkundet. Termi i ri është „bloom skin“, dhe dallimi nuk është vetëm te emri.

„Glass skin kërkonte efektin e pasqyrës, lëkurë të lëmuar, gati të tejdukshme, që arrihej me rutina me shumë shtresa produktesh. Bloom skin kërkon shkëlqim që vjen nga brenda - nga lëkura e hidratuar, me barrierë të fortë mbrojtëse dhe ngjyrë të njëtrajtshme. Pamje e shëndetshme, e jo përfundim artificialisht i lustruar që më së shpeshti vinte nga fakti se produkti i fundit në fytyrë kishte shkëlqim“, shpjegon dr. Rita Seco, mjeke estetike me klinikë në Porto dhe ordinancë në Madrid.

Arsyet për ndryshimin janë praktike. Ekspertët paralajmërojnë se shkëlqimi ekstrem është shumë i vështirë për t'u fotografuar, prandaj nuk e rekomandojnë për ngjarje të rëndësishme. Dhe koha e nevojshme për lëkurën prej qelqi zmbraps vetvetiu. „Tani bloom skin po fiton rëndësi sepse shpejt u kuptua që rutinat me dhjetë hapa dhe përbërësit agresivë aktivë janë joefikasë, e ndonjëherë edhe të dëmshëm për lëkurën“, thotë Seco. Ironia është e bukur: e njëjta industri që për vite i shtynte rutinat me dhjetë hapa, tani shet minimalizëm.

Drejtimi i ri, sipas saj, është „kthim te thelbi: më pak produkte, të zgjedhura me më shumë kriter, dhe fokus te shëndeti i lëkurës në vend të efektit të menjëhershëm dhe thjesht sipërfaqësor të shkëlqimit“.

Gjashtë përbërësit aktivë

Seco veçon gjashtë përbërës për shkëlqim të shëndetshëm dhe natyral - me shënimin se vlen e gjithë formula, e jo numri i produkteve:

• Acidi hialuronik - hidraton dhe e zbut mënyrën si bie drita mbi lëkurë.
• Ceramidet - i rinovojnë lipidet që ndërtojnë barrierën mbrojtëse, sipas ekspertes „baza e gjithçkaje“.
• Vitamina C - stresi oksidativ është një nga arsyet pse lëkura duket më e errët, ndërsa ky është antioksidanti par excellence.
• Peptidet - mund ta stimulojnë krijimin e kolagjenit dhe ta përmirësojnë dendësinë e lëkurës.
• Niacinamidi - e rregullon sekretimin e sebumit dhe e forcon barrierën.
• Retinoli - nxit rinovimin e qelizave, por përdoret me kujdes.

„Është gabim të mendohet se sa më shumë përbërës aktivë, aq më mirë. Kombinimi i duhur, i përshtatur për çdo lloj lëkure, vlen më shumë se dhjetë produkte të aplikuara rastësisht vetëm sepse i kemi parë në TikTok“, thotë Seco. Këshilla e saj është një rutinë e shkurtër: pastrim i butë, krem me ceramide, mbrojtje e përditshme nga dielli dhe në mbrëmje serum me një përbërës aktiv funksional. „Kjo mjafton për shumicën e llojeve të lëkurës. Shtimi i më shumë se kaq rrallë sjell më shumë shkëlqim, ndërsa e rrit rrezikun e acarimit.“

Nga zakonet, ndikimin më të madh e ka gjumi, „sepse pikërisht natën lëkura rinovohet dhe e rregullon barrierën, e kjo shihet drejtpërdrejt në pamjen e ditës së nesërme“. Seco bën edhe një dallim të rëndësishëm: lëkura e yndyrshme e reflekton dritën në mënyrë të parregullt, e shëndetshmja - në mënyrë të njëtrajtshme. „Shkëlqimi i vërtetë nuk do të thotë shkëlqim yndyror në zonën T.“

Fjalia e saj e fundit do të duhej të qëndronte në çdo raft në barnatore dhe parfumeri: „Shkëlqimi nuk aplikohet, ndërtohet - ai është rezultat i një barriere të shëndetshme, e jo i një produkti të izoluar.“ Për secilën që ka një sirtar plot me serume gjysmë të zbrazëta, kjo është ndoshta këshilla më e lirë për bukuri këtë vit.