Kryeministri Hristijan Mickoski paralajmëroi se deri në fund të vitit është i mundur edhe një rishikim i Buxhetit, pas atij të miratuar në korrik. Arsye janë akcizat dhe TVSH-ja e ulur për karburantet, me të cilat Qeveria i amortizon shtrenjtimet e derivateve të naftës. Vetëm nga akcizat, siç tha ai, në arkë do të hyjnë rreth pesë miliardë denarë më pak, ndërsa për shkak të TVSH-së së ulur edhe rreth një miliard. Gjithsej 6 deri në 7 miliardë denarë, gjegjësisht mes 97 dhe 113 milionë euro.

„Presim që deri në fund të vitit të jemi 6-7 miliardë denarë më të shkurtër në krahasim me atë që e kemi planifikuar, prandaj është e mundur të kemi edhe një rishikim deri në fund të vitit“, deklaroi Mickoski pas vënies në përdorim të konviktit studentor të rinovuar „Stiv Naumov“ në Shkup. Këtë e quajti sakrificë të madhe për një buxhet si i yni, por porositi se prioritet është të ruhet standardi i qytetarëve dhe, siç pohon ai, çmimi më i ulët i karburanteve në Evropë.

Rishikimi i korrikut i rishikoi të hyrat e përgjithshme në 379,5 miliardë denarë, ndërsa shpenzimet në 425,8 miliardë. Deficiti është projektuar në 46,3 miliardë denarë, ose 4,1 përqind e BPV-së. Sipas të dhënave më të fundit për realizimin, deri tani janë shpenzuar rreth 4,9 miliardë euro, mbi 70 përqind e planit vjetor të shpenzimeve, ndërsa të hyrat janë rreth 4,2 miliardë euro, ose rreth 68 përqind e të planifikuarës.

Ministrja e Financave Gordana Dimitrieska-Koçoska nuk e përjashton rishikimin e ri dhe thotë se kjo nuk është e pazakontë - në vitin 2022 pati dy. Ajo pohon se edhe me rishikim të ri deficiti do të mbetet në 4,1 përqindëshin e projektuar të BPV-së. Nëse të hyrat bien e deficiti mbetet i njëjtë, matematika është e thjeshtë: diçka duhet të shkurtohet. Rishikimi i korrikut siguroi mjete shtesë për investime kapitale, zhvillim lokal, bujqësi dhe mbrojtje sociale. Cila prej tyre do ta ndiejë e para gërshërën e re?

Inflacioni, sipas kryeministrit, është nën kontroll: 2,3 përqind në korrik, 2,6 në gusht, nën mesataren evropiane. Karburanti i lirë ndihmon që kjo pamje të duket e qetë. Por çmimi i subvencionuar nuk është çmim falas - ai thjesht paguhet diku tjetër, përmes buxhetit, ndërsa çmimi i naftës në bursat botërore, që lëviz mbi 100 dollarë për fuçi, nuk varet nga Shkupi. Sa rishikime mund të durojë politika „më lirë në Evropë“ nëse fuçia nuk bie?