Katër aktore spanjolle, një tregim që secili e njeh, dhe një video që s'e kërkon askush, por të gjithë e shohin. Seria e re „Cabeza Alta” nuk nis me vrasje as me mister - nis me një video intime që del në internet pa leje.

Tregimi është përshtatje e serisë së suksesshme italiane „A testa alta”. Veronika, një drejtoreshë e nderuar shkolle që prej vitesh punon me adoleshentë pikërisht për parandalimin e varësisë dixhitale, zgjohet në makth: një video, e filmuar dhe e publikuar pa vullnetin e saj. Dhe ajo që nis si poshtërim personal, hapet në diçka më të madhe - shantazh, interesa të fshehta, një hetim që shkon shumë përtej vetë klipit.

Leonor Watling luan Veronikën. „Ajo që ka më shumë rëndësi këtu nuk është shkaku, por reagimi i personazhit”, thotë ajo - si një grua, bota e së cilës shembet ndërsa përpiqet të ruajë dinjitetin, ndërkohë që bota e gjykon. Paz Vega luan Sesilian, motrën, rreshtere në Gardën Civile, që s'ka as grimcën më të vogël të dyshimit se ajo që i ndodhi së motrës është krim. „Nuk është hakmarrje, por drejtësi”, thotë.

Silvia Abaskal dhe Lusia Himenes e plotësojnë ekipin - njëra si drejtoreshë akademike dhe mike e ngushtë e Veronikës, tjetra si avokate që zbulon pyetjen pas videos: pse pikërisht kjo video, pse ky moment, kush qëndron pas saj.

Por më interesante bëhet kur aktoret flasin për veten. Të katërta pranojnë se kanë një marrëdhënie të ngarkuar me rrjetet sociale. Watling e përshkruan veten si „shumë të mbyllur”, Abaskal thotë se „harron të fotografojë, harron të filmojë, e për selfie as që bëhet fjalë”. Himenes shkoi aq larg sa shkroi një film për marrëdhënien e brezit Z me ekranet. „Ne prindërit po çmendemi”, thotë.

Dhe këtu seria godet më fort. Vega u përsërit vazhdimisht fëmijëve të saj: „Kurrë mos bëj diçka për të cilën nesër do të pendohesh.” Një këshillë që tingëllon e thjeshtë, por është gati e pamundur për një brez që rritet me telefonin në dorë. Abaskal shton një fjali që vlen më shumë se e gjithë seria: „Këto gjëra ekzistojnë sepse njerëzit i konsumojnë.” Një kujtesë e përsosur se çdo video që dikush e shikon - ka një çmim që e paguan dikush tjetër.