Këtë verë rrjetet i pushtoi pamja australiane e grimit - lëkurë e çelët me ton të ngrohtë, njolla të dukshme, e kuqe e përqendruar te hunda dhe mollëzat, bronzer në vend të konturimit dhe buzë me shkëlqim. Efekti sikur ke kaluar një pasdite në plazh. Problemi nuk është te pamja. Problemi është te një hap që tutorialet e paraqesin si truk.

Ai hap është përzierja e kremit me faktor me të kuqen e lëngshme, bronzerin ose bazën, drejt e në pëllëmbë, para aplikimit. Dermatologët e hedhin poshtë pa hezitim. Dr. Kristina Garsia Milian, drejtoreshë mjekësore e një klinike në Madrid, shpjegon pse: „Efikasiteti i kremit me faktor varet në masë të madhe nga sasia që aplikojmë, dhe kur përdorim shumë pak, mbrojtja e vërtetë zvogëlohet ndjeshëm.”

Me përzierjen, dy gjëra bëhen të pasigurta njëkohësisht - edhe përqendrimi i filtrit mbrojtës në përzierje, edhe sasia që vërtet arrin në fytyrë. Ndërsa faktori i shkruar në shishe do të thotë diçka vetëm nëse produkti aplikohet në sasinë në të cilën është testuar.

Radha e duhur është e mërzitshme dhe pikërisht prandaj askush nuk e xhiron: së pari krem me faktor 50 ose më shumë, pritet disa minuta të thithet, pastaj grim i lehtë. Jordi Hustribo, grimier profesionist dhe bashkëpronar i një studioje bukurie, e thotë të njëjtën nga ana tjetër e banakut - baza e çdo rutine mbetet kremi me faktor i aplikuar si duhet dhe në sasi të mjaftueshme. Përzierja, shton ai, e ndryshon teksturën, ia shkurton qëndrueshmërinë dhe e prish rezultatin. Pra as nuk mbron, as nuk duket më mirë.

Grimi me faktor mund të plotësojë, por nuk mund të zëvendësojë. Dhe riaplikimi çdo dy orë gjatë ekspozimit mbetet - përfshirë qafën, veshët, dekoltenë dhe duart, vendet që rregullisht harrohen.

Për ata që nuk duan të shtojnë hapa, ekzistojnë kremra me faktor me ngjyrë, stikë me faktor dhe sprejë freskuese mbi grim. Garsia Miliani i rekomandon formulat me ngjyrë sidomos për njerëzit e prirur ndaj njollave, sepse disa përmbajnë okside hekuri që mbrojnë edhe nga drita e dukshme.

Ironia e gjithë historisë qëndron te origjina e trendit. Australia ka një nga normat më të larta të kancerit të lëkurës në botë dhe pikërisht prandaj mbrojtja nga dielli atje është pjesë e përditshmërisë, jo temë verore. Pamja që bota po kopjon u shpik në një vend që mësoi sa kushton origjinali.