Në kantierin e stadiumit të ri në Haraçinë u dogj një ekskavator, vetëm disa ditë pas fillimit të punimeve ndërtimore. Rasti u paraqit në polici pas mesnatës, rreth orës 02:36. Të lënduar nuk ka, ndërsa zjarrin e shuan ekipet e Brigadës Kundërzjarrit të Shkupit.

Gurthemeli për stadiumin u vendos javën e kaluar. Bëhet fjalë për stadium ndihmës për FK „Shkëndija“ nga Haraçina, investim prej rreth 550.000 eurosh, me të cilin duhet të sigurohen kushte bashkëkohore për sportin dhe për futbollistët e rinj.

Kryetari Daut Bekiri nuk ka dilemë se bëhet fjalë për akt të qëllimshëm. „Organet e rendit po e hetojnë rastin dhe kërkojmë që ai të sqarohet sa më shpejt. Por, të jemi të qartë, askush nuk do të na ndalë. Punimet do të vazhdojnë, projekti do të përfundojë dhe stadiumi për FK ‚Shkëndija‘ do të ndërtohet. Haraçina e priti këtë ditë 5 deri në 10 vjet. Mund të digjen makinat, por nuk mund të digjen vullneti dhe dëshira për ndërtim“, deklaroi ai.

Reagoi edhe VLEN. „Ajo që ndodhi në kantierin e stadiumit të ‚Shkëndijës‘ nuk është vetëm dëmtim i disa makinave. Është përpjekje për të sulmuar një projekt që simbolizon zhvillimin, investimet dhe një të ardhme më të mirë për Haraçinën“, njoftoi partia dhe shtoi se „zhvillimi nuk ndalet me zjarr, vandalizëm apo kërcënime“.

Deklaratat erdhën më shpejt se përgjigjet. Deri tani publiku e di orën e denoncimit dhe ekskavatorin e djegur. Nuk e di nëse bëhet fjalë për djegie të qëllimshme apo për aksident, as kush do të përfitonte nga ndalimi i një projekti prej gjysmë milioni eurosh. Këto janë pyetje për policinë, jo për konferencat për shtyp. Nëse dikush vërtet u ka vënë zjarrin makinave për të ndalur një stadium, emri duhet të dëgjohet para se tribunat të marrin ulëse.