Vetëm para pesë ditësh NQP Shkup, me mbështetjen e Qytetit, njoftoi zyrtarisht se po fillon me futjen e kartelës digjitale studentore për transportin publik falas. Të dhënat duhej të sinkronizoheshin automatikisht mes universiteteve dhe NQP-së, ndërsa studentët të merrnin kod QR në telefon.

Pastaj erdhi seanca e Këshillit të Qytetit të Shkupit. Ndryshimet e miratuara në Vendimin për sistemin tarifor të integruar sjellin leje digjitale, por vetëm për nxënësit e vitit të parë në shkollat e mesme në kompetencë të Qytetit dhe në shkollat e mesme shtetërore. Në fazën e ardhshme do të vijnë nxënësit e vitit të dytë, të tretë dhe të katërt, të cilët tashmë kanë kartela elektronike të personalizuara. Studentët në vendim nuk përmenden.

Drejtori i NQP-së, Sashe Ilievski, shpjegoi se qëllimi është më pak sportele dhe më pak pritje. Përdoruesit do të marrin udhëzime me email, ndërsa në aplikacionin e NQP-së do të kenë kod QR. Për studentët, tha ai, do të vijë më vonë. „E gjithë procedura duhet të shkojë hap pas hapi“, porositi ai. Kur saktësisht, nuk tha.

Leja digjitale do të jetë e personalizuar dhe NQP do të mund ta bllokojë në rast përdorimi të parregullt. Për lëshimin nuk do të kërkohet fotografim në vend as fotografi e shtypur, nëse identifikimi bëhet përmes sistemit elektronik.

Ka edhe një pjesë të vendimit që meriton më shumë vëmendje se kodi QR. Në çdo validim do të regjistrohen data dhe ora, automjeti, shoferi, linja, drejtimi, stacioni, si dhe të dhënat për përdoruesin dhe kategorinë së cilës i përket, sipas rregullave për mbrojtjen e të dhënave personale. Për nxënësit e vitit të parë kjo do të thotë hartë e detajuar e çdo udhëtimi të tyre.

Digjitalizimi është i mirëseardhur, sidomos nëse i shkurton radhët. Por pyetjet janë dy. Pse u avullua paralajmërimi për studentët brenda pesë ditëve? Dhe kush, sa gjatë dhe për çfarë qëllimi do t'i ruajë të dhënat për lëvizjen e nxënësve nëpër qytet?