Puse të reja për ujë në Sushicë, Konjar të Epërm, Katllanovë, Bllacë, Kozhle, Totincë dhe Brezicë. Katër rrugë të asfaltuara në Rzhaniçinë, me rrjet kanalizimi dhe atmosferik, ndriçim rrugor dhe trotuare të ndërtuara më parë. Dy rrugë në Onjancë, ku kanalizimi tashmë përfshin rreth 90 përqind të vendbanimit. Kjo është pjesë e listës së projekteve të realizuara në Komunën e Petrovecit gjatë vitit të kaluar.

Lista vazhdon: rrugë të shtruara me pllaka dhe kanalizim në Konjar të Mesëm, fushë e re shumëfunksionale në Konjar të Poshtëm, asfalt në Petrovec, Katllanovë dhe Banjën e Katllanovës, rrugë me pllaka betoni në Gradmancë, projekt trafiku dhe sinjalizim i ri për Petrovecin dhe Rzhaniçinën. Në SHFK „Bratstvo i edinstvo“ është rindërtuar tavani dhe janë rregulluar hapësirat ndihmëse të sallës sportive, ndërsa në bashkëpunim me Federatën e Futbollit të Maqedonisë janë rindërtuar fushat e futbollit në Petrovec, Rzhaniçinë, Konjar të Poshtëm dhe Konjar të Mesëm.

Ka edhe para direkt në dorë. Pensionistët me pension deri në 23.000 denarë morën nga 2.500 denarë, për çdo nxënës të klasës së parë janë siguruar nga 4.000 denarë, personat me aftësi të kufizuara morën nga 20.000 denarë, ndërsa për familjet në nevojë sociale janë ndarë më shumë se 230 pako humanitare për Pashkë dhe Bajramin e Ramazanit. Janë blerë dy kamionë për grumbullimin e mbeturinave, ndërsa në fazën përfundimtare është asfaltimi i rrugës Divlje - Konjar i Mesëm, e gjatë 6.630 metra.

Lista është konkrete, me emra fshatrash dhe me shifra, që nuk është gjë e vogël. Por një detaj të vret sytë: pasqyra vjetore e punës së komunës arriti te publiku përmes një kumtese të VMRO-DPMNE-së. Puset, asfalti dhe pakot janë paguar me para publike, ndërsa meritën e njofton një parti.

Sa herë deri tani keni lexuar rezultate komunale të nënshkruara nga një qendër partiake? Dhe kur asfalti dhe pakot për festa paraqiten si sukses partiak, a marrin banorët e Petrovecit shërbim nga komuna e tyre - apo dhuratë për të cilën dikush do ta kërkojë faturën në zgjedhjet e ardhshme?