Lideri i partisë më të madhe opozitare, Venko Filipçe, në një konferencë partiake për shtyp në Kuvend, në prag të vizitës së presidentes së Komisionit Evropian, Ursula fon der Lajen, e quajti kryeministrin Hristijan Mickoski „idiot i plotë“ që flet „marrëzira“.

Shkaku, të paktën sipas Filipçes, ishte Evropa. „Nuk e di nëse jeni të vetëdijshëm çfarë peshe politike ka ky moment në të cilin, pas 30 e ca vjetësh, ne jemi në rrugë pa krye për Evropën me dëshirën personale të Hristijan Mickoskit. Deri në vitin 2030 dera e Evropës është e hapur. Shtete anëtare do të bëhen Shqipëria, Mali i Zi, Ukraina dhe Moldavia. Ne nuk jemi“, tha ai.

Përgjigjja nga VMRO-DPMNE erdhi sipas së njëjtës recetë, vetëm me shenjë të kundërt. „Kjo është gjuhë urrejtjeje dhe fjalim i një njeriu që qartazi gjendet në krizë serioze dhe gjendje të ndërlikuar“, reagoi koordinatori i grupit parlamentar të partisë në pushtet, Nikolla Micevski.

Kuvendi deri tani ka dëgjuar edhe „pulë“, edhe „morr“, edhe „bagëti“. Kodi i ri i sjelljes së deputetëve qartazi nuk e arriti fjalorin. Komunikologu Bojan Kordalov propozon një zgjidhje që tingëllon pothuajse naive: rregullore ose ligj me dënime të qarta për fyerjet. „Ja, për fillim, në foltoren e Kuvendit le t'i vizatojnë të gjitha fjalët dhe le të tregojnë qartë se punojnë me shembull personal“, thotë ai, duke paralajmëruar se në të kundërtën çdo incident i radhës do të jetë „për t'u habitur“.

Filipçe të njëjtën ditë hapi front edhe në shtëpinë e vet. Platforma „12 dhe 5“ në LSDM iu përgjigj se përdor „fjalor jashtëzakonisht primitiv“ dhe se „gjithnjë e më shumë i ngjan ish-punëdhënësit të tij Nikolla Gruevski“.

Dhe kështu, në ditën kur Brukseli vjen në Shkup, tema nuk është udhërrëfyesi ku, sipas Filipçes, ne mungojmë, as përgjigjja e Qeverisë ndaj këtij pohimi. Tema është një fjalë. Për opozitën është titull, për pushtetin alibi për të mos iu përgjigjur thelbit. Kush do ta udhëheqë tani debatin që në të vërtetë është i rëndësishëm, nëse tema kryesore në Kuvend është kush si e quajti kë?