Agjencia për Siguri Kombëtare pohon se ka zbuluar një rrjet propagandistik në Maqedoni që punon „në funksion të interesave ruse“. Rrjeti, sipas ANS-së, nuk fshihet në një dhomë të errët, por në internet, pas pseudoportaleve të klonuara të regjistruara me domene maqedonase.

„Përmes këtyre pseudoportaleve përhapen lajme të rreme, dezinformata dhe bëhet riformësimi i narrativave për ngjarjet aktuale, me çka minohet besimi në institucione dhe nxitet urrejtja dhe mosduruesia etnike dhe kombëtare“, njoftoi Agjencia.

Çfarë njoftoi në të vërtetë ANS

Konkretisht, më 18 shtator, në koordinim me MPB-në dhe Prokurorinë Publike, u ndërmorën veprime hetimore kundër një shtetasi maqedonas „të lidhur me faktorë të huaj që janë krijues të një aparati propagandistik me rrjet portalesh“. Në shtëpinë e tij u krye kontroll, ndërsa sendet e sekuestruara po ekspertohen. Dyshimet janë për tri vepra penale: nxitje e urrejtjes, përçarjes dhe mosdurimit kombëtar, racor dhe fetar, zbulim i sekretit zyrtar dhe përhapje e materialit racist dhe ksenofob përmes sistemit kompjuterik.

ANS nuk publikoi asnjë emër, as të personit, as të portalit. Nuk publikoi as detaje se kush e financon rrjetin dhe si është i lidhur me, siç thotë, „strukturat politike proruse rajonale“. Më misteriozja është zbulimi i sekretit zyrtar: kush kishte sekret për të zbuluar, dhe nga e mori atë?

Gjurma nga kjo verë

Agjencia thotë se ky është vazhdim i rastit të 4 marsit, kur një 30-vjeçar nga Shkupi u kallëzua për përhapje të materialit ksenofob përmes faqes në Facebook „Të dhëna historike për Maqedoninë“ dhe për shtypje të materialit propagandistik. Atëherë institucionet deklaruan se e nxiste një shtetas bullgar, ndërsa në publik si nxitës u përmend Viktor Stojanov, kryetar i Fondacionit bullgar „Maqedonia“ nga Sofja, i cili ka ndalim hyrjeje në vend.

Një hulumtim gazetaresk i publikuar në korrik tregoi të paktën pesë faqe në Facebook në gjuhën maqedonase të menaxhuara nga Bullgaria, të cilat merrnin përmbajtje nga pesë portale të regjistruara në Maqedoni dhe një nga jashtë, të gjitha me dizajn pothuajse identik. Portali i huaj, sipas atij hulumtimi, është i lidhur për nga adresa dhe kapitali me Fondacionin „Maqedonia“, ndërsa një pjesë e adresave të kontaktit të depozituara gjatë regjistrimit të domeneve maqedonase janë adresa të të njëjtit fondacion. Përshkrimi në kumtesën e sotme të ANS-së përputhet pothuajse plotësisht me atë model.

Stojanov reagoi ndaj pohimeve të tilla qysh në korrik, kur u mor vesh se institucionet po hetojnë rreth njëzet media online. Në një kumtesë përmes agjencisë bullgare BTA i quajti „hetime të rreme të drejtuara kundër mediave të pavarura qytetare“, me qëllim që autoritetet të mund t'i arrestojnë dhe t'i ndjekin penalisht redaktorët dhe gazetarët e tyre. Një rrjet për të cilin ANS thotë se punon në funksion të interesave ruse mbrohet me fjalorin e lirisë së medias. Ballkani ka parë edhe maska më të çuditshme.

Kontrolli ishte para dy javësh, ndërsa kumtesa erdhi vetëm tani - pa asnjë emër portali. Nëse shteti e di çfarë janë, ku janë regjistruar dhe çfarë përhapin, pse lexuesit ende nuk e dinë cilat janë? Dhe kur do të thotë ANS kush qëndron pas tyre, me emër e mbiemër?