Një punonjës i OpenAI u arrestua për një pajisje të fshehur pas televizorit në sallën e udhëheqjes: akuza është për përgjim, FBI flet për „superinteligjencë“

Kompania që flet publikisht për „superinteligjencë“ zbuloi se bisedat e saj më të ruajtura mund t'i ketë dëgjuar një pajisje e lidhur në portin USB të një televizori të zakonshëm. Sipas prokurorëve federalë në San Francisko, Abdulrahman Alfozan, shtetas i Arabisë Saudite dhe punonjës i OpenAI, vendosi një pajisje të fshehur incizimi pas ekranit në një nga sallat e mbledhjeve të udhëheqjes.

Alfozan u shkarkua dhe u arrestua më 9 tetor, rreth një javë pasi kompania e gjeti pajisjen. Zëdhënësi i OpenAI, Nate Evans, konfirmoi se ai punonte në kompani që nga korriku 2025, në ekipin e produkteve. Mënyra si u kap është pothuajse filmike: OpenAI vendosi një kamerë pikërisht aty ku kishte qenë pajisja, dhe kamera, sipas prokurorëve, e incizoi duke shikuar pas televizorit.

Kompania thotë se pajisja ishte „e sofistikuar“ dhe se për ta kuptuar përdori modelet e veta të brendshme të inteligjencës artificiale. Sipas OpenAI, ajo kishte „enkriptim të avancuar, aftësi për monitorim audio dhe mekanizëm për transmetim të të dhënave të dizajnuar për t'i shmangur mbikëqyrjes“. Sa ndryshon kjo vërtet nga një pajisje e zakonshme incizimi, për momentin nuk është e qartë. E qartë është vetëm se OpenAI arriti që edhe në krizën e vet të sigurisë të fusë reklamë për modelet e veta.

Pyetja kryesore është çfarë është marrë, dhe përgjigjja e OpenAI është e formuluar me kujdes: „Në këtë moment nuk kemi indikacione se ky person ka pasur qasje të paautorizuar ose ka nxjerrë peshat e modeleve, kodin burimor ose të dhënat e përdoruesve.“ Fjalët kyçe janë „në këtë moment“.

Akuza për momentin është për përdorim të pajisjes elektronike për përgjimin e bisedave gojore, pra incizim i fshehtë i zërave të të tjerëve pa leje. Nëse dënohet, Alfozan rrezikon pesë vjet burg. As ai, as avokati i tij nuk mund të kontaktoheshin menjëherë. Drejtori i FBI-së, Kash Patel, shkoi më larg se akuza dhe deklaroi se qëllimi ishte të „kapeshin bisedat e ndjeshme për teknologjinë e superinteligjencës së kompanisë“.

Kjo është fjali e madhe për një pajisje të vogël. Zyrtarisht, për çfarë shërbente pajisja ende nuk është shpjeguar, ndërsa akuza e vetme është për incizim të paligjshëm. Ballkani e di mirë sa shpejt përgjimi bëhet politikë, e sa ngadalë arrin në gjykatë. Pyetja është nëse kjo histori do të përfundojë në sallë gjyqi apo në tituj për garën e inteligjencës artificiale.