Битола доби и „Чкембе Фест“, а на хартија за фестивали и манифестации се предвидени 30-тина милиони денари

Битола има фестивал за филмска камера, за фолклор, класична музика, џез, театар, Шекспир, млади, староградска музика и култури од светот. Од 9 до 11 октомври добива и фестивал за чкембе. Првото издание на „Чкембе Фест Битола 2026“ сака од традиционалната чкембе-чорба да направи туристички и културен бренд.

Програмата предвидува гастрономски натпревари во три категории – традиционална чкембе-чорба, мезе од чкембе и специјалитет од чкембе – како и изложби, органска храна, ракотворби, фолклорни ансамбли и естрадни настапи, со туристичка тура за гостите и учесниците. Изборот на тема не е случаен: колективниот прекар на Битолчани е Чкембари.

Организаторите сакаат и академски печат. Во петокот на 9 октомври, во 12 часот во Кино „Манаки“, е закажана Првата меѓународна стручно-научна трибина за гастрономски туризам, „Балканска кујна – традицијата и актуелните тенденции во туризмот и угостителството“. Предавања ќе држат професорите Науме Мариноски, Сашо Коруновски и Климент Наумов. „Сакаме да покажеме дека гастрономијата не е само храна“, вели координаторот Никола Каровски, а заклучоците, најавува тој, ќе стигнат како препораки до институциите.

Град на фестивали – и град на јавни пари

Зад добрата атмосфера има и сметка. Општина Битола во Програмата за култура за 2026 година издвоила 8,75 милиони денари директно за 18 наведени фестивалски проекти. Најголемата ставка е фестивалот „Браќа Манаки“ со 3 милиони денари, за „Илинденски денови“ се предвидени 800.000, за „Битола отворен град“ и за Шекспир фестивалот по 600.000, а за „Белата ноќ на Широк сокак“ 500.000 денари.

Тоа не е сè. За одбележувањето на 4 Ноември се предвидени 900.000 денари, за БИТФЕСТ 3,2 милиони, уште 3 милиони за „дополнителни“ културни настани, а Програмата за туризам носи вкупно 9 милиони денари, од кои 6 милиони само за „Зимска приказна“. На хартија, за фестивали и манифестации се предвидени 30-тина милиони денари.

Дел од фестивалите се покриени целосно од Општината, дел и од Министерството за култура, а сите бараат и спонзори. Никој не тврди дека градот не треба да живее. Но кога секоја нова идеја станува фестивал, разумно е да се праша каде е границата – и дали некој некогаш ќе измери колку туристи, ноќевања и пари вратил секој од нив.

Ако „Чкембе Фест“ успее да стане меѓународен гастрономски бренд, како што посакуваат организаторите, Битола ќе има уште еден повод за гордост. Ако не успее, ќе остане уште една точка во веќе преполниот фестивалски календар.