Џемајма Голдсмит се омажи на педесет и две години. Втор пат. Младоженецот е Камерон О’Рајли, шеесет и двегодишен ирско-австралиски финансиер, а по патеката ја одведоа нејзините синови – Сулејман на дваесет и девет и Касим на дваесет и седум години. Тие двајца се синови на Имран Кан, кој во моментов е во затвор во Пакистан.

Ако постои свадба што носи повеќе биографија отколку што може да понесе еден ден, тоа е оваа.

Фустанот што не се извинува

Дизајн на „Oscar de la Renta“: деколте без ракави што паѓа од рамената, транспарентни делови, слоевита сукња во А-линија и раб до средината на потколеницата, под кој се гледаа бели чевли со срцевидна потпетица. Појас од цвеќиња околу половината и краток превез со кристали.

Ова е важно, а не е мода. Невеста на педесет и две години што не се крие зад долг ракав, затворено деколте и палета во боја на шампањ – тоа сè уште е порака, и во Лондон и уште повеќе кај нас. Бројот на македонски свадби на кои втор брак значи дискретно, тивко и подалеку од објектив е поголем отколку што сакаме да признаеме.

Триесет години една приказна

Во 1995 година Голдсмит се омажи за Имран Кан, тогаш најпознат крикет играч на Пакистан, подоцна премиер. Премина во ислам, се пресели во Лахоре. Се разведоа во 2004, но останаа во добри односи – што е реченица што ретко ја читаме, а уште поретко ја живееме.

Кан е затворен од 2023 година по обвиненија за корупција што тој ги нарекува политички мотивирани и е осуден на три години. Голдсмит и нејзините синови јавно се залагаат за неговото ослободување. Тоа значи дека жената што вчера се венчаваше во бел фустан, паралелно води кампања за ослободување на својот поранешен сопруг, и тоа не се крие.

Врската со Дијана

Голдсмит беше блиска пријателка на принцезата Дијана. Кан ѝ ги овозможи посетите на Пакистан во 1996 и 1997, кога Дијана работеше на добротворни кампањи таму. Хазнат Кан, еден од луѓето со кои Дијана била во врска, беше далечен роднина на Имран. Двајцата беа на погребот на Дијана во 1997 година.

Професионално, Голдсмит е продуцентка и сценаристка со околу триесет часа телевизија за американски и британски канали, вклучувајќи ја и серијата „The Crown“. Со Камерон О’Рајли се запознале преку работа на филм и документарци, а заедно се околу година и половина.

Во 2023 година, за еден магазин, го кажа она што сега звучи како објаснување за целата оваа приказна: „Професионално, верувам дека човек секогаш се гордее со она што му било тешко да го постигне.“