Во населбата Козле во Карпош започна изградбата на нова градинка „Пролет” со капацитет за 130 деца. Камен-темелникот го постави премиерот Христијан Мицкоски, а проектот се финансира преку Министерството за социјална политика, демографија и млади.

За родителите кои со години се борат за место во преполните градинки, ова е една од ретките вести што директно го допира секојдневието. Недостигот на места во јавните градинки е хроничен проблем во Скопје – листите на чекање се долги, а приватните алтернативи скапи. Секои 130 нови места значат 130 семејства што полесно дишат.

Интересно е и тоа што градинката доаѓа под ресорот за демографија – истото министерство што се занимава со падот на наталитетот. Логиката е јасна: тешко е да очекуваш луѓето да имаат деца ако немаат каде да ги остават додека работат. Градинките не се само згради, туку дел од одговорот на демографското прашање.

Камен-темелниците се омилен жанр на секоја влада – фотографија, лопата, насмеани функционери. Метла секогаш ќе чека да види што има на крајот: дали градинката ќе се отвори на време, со сите 130 места пополнети, или ќе остане еден од оние проекти што блескаат на почеток, а тивко доцнат со години. За децата од Козле, се надеваме на првото.