Не помина ни недела од елиминацијата на Кливленд од Њујорк, а летниот пазар веќе го носи најголемото име во НБА на познат курс – ЛеБрон Џејмс повторно се поврзува со Кавалирс, и тоа преку трансфер кој звучи апсурдно дури и по стандардите на НБА.

Според сценариото на ClutchPoints и аналитичарот Брет Сигел, единствениот легален пат за повторно соединување на ЛеБрон и Кливленд оди преку sign-and-trade со Лос Анџелес Лејкерс. Договорот би вклучил центарот Џарет Ален со плата од 28 милиони долари, кого Лејкерс одамна го следат, и евентуално крилниот играч Дин Вејд.

Бројките не се пријателски. ЛеБрон излегува од договор од 52,6 милиони долари, и според извештаите нема намера да оди на симболична плата. Кливленд веќе е „second-apron” тим – најзагрозена даночна категорија во НБА – и за да помине ваква замена, мора да го убеди Џејмс Харден да потпише нов договор со огромен попуст и да испрати уште неколку играчи на излезен пат.

За Лејкерс приказната има логика – центар покрај Лука Дончиќ е она што Лос Анџелес го бара цела сезона. За Кливленд, разговорот за враќање на 41-годишен ЛеБрон за „last run” звучи романтично – до моментот кога ќе ја погледнете висината на платниот список. Сценариото е реално само на хартија.