Александар Вучиќ во четвртокот соопшти дека изборите во Србија може да бидат распишани за неколку дена или неколку недели. И додаде нешто што ретко се слуша од балкански лидер: пред да влезе во кампањата, ќе поднесе оставка на функцијата претседател.

Образложението звучи речиси идеално. „Тогаш веќе нема да бидам функционер и не можам да користам државни ресурси, освен минимално обезбедување. Мислам дека не може да биде поправедно од тоа”, изјави тој пред новинарите во Палатата Србија, по приемот за учесниците на кампот „Србија те зове 2026″.

Значи, човекот доброволно се откажува од апаратот. Само – зошто сега? Законот тоа не го бара и Вучиќ тоа отворено го признава. Оставката не е обврска, туку гест. А гестовите на Балканот обично доаѓаат со сметка приложена подоцна.

Кампања без функција, но не и без моќ

Тука е и деталот што секој искусен читател на балканска политика веднаш ќе го забележи. Оставката на претседателската функција не е оставка на партиската. Државниот ресурс формално исчезнува од сликата, партискиот останува непроменет – истите луѓе, истите медиуми, истата мрежа. Дали одземањето на титулата навистина ја израмнува теренот, или само го преместува од едно место на друго?

Вучиќ вели дека ќе им честита на политичките противници ако победат, но се сомнева дека тие би му го возвратиле истото во обратен случај. „Ќе го прифатам резултатот ако нивните анкети се точни и ако противниците нè победат. Граѓаните ќе го имаат последниот збор”, рече тој. Реченицата е внимателно составена – победата на другите е претставена како хипотеза која зависи од точноста на туѓите анкети.

Трамп ќе почека

На прашањето за можна посета на американскиот претседател Доналд Трамп, Вучиќ беше поконкретен отколку за изборниот датум. Условите, вели, не се тука. „Србија наскоро ќе има избори, а Соединетите Држави имаат меѓуизбори. Дури откако овие процеси ќе завршат може реално да очекуваме посети на високо ниво меѓу нашите земји.”

Девет и пол години на власт, а изборниот датум сè уште не е кажан. Оставката е најавена, но не и потпишана. Кампањата почнува, а формално не почнала. Србија влегува во изборен циклус во кој се знае сè освен она што е најважно – кога.