Фондацијата „Бил и Мелинда Гејтс“ ќе донира 912 милиони долари на Глобалниот фонд за борба против СИДА, туберкулоза и маларија, објави Бил Гејтс на настанот Reuters Newsmaker во Њујорк. Тој ги повика владите да го спречат глобалното намалување на финансирањето за здравството, предупредувајќи дека милиони деца би можеле да умрат доколку средствата продолжат да се кратат.

Оваа донација е идентична со онаа од 2022 година, кога Фондот последен пат собираше средства во рамки на тригодишниот буџетски циклус. Но, годинава таа доаѓа во услови на сериозни кратења на државната помош, предводени од САД.

Според Институтот за здравствени метрики и евалуација (IHME), глобалната развојна помош е намалена за 21% меѓу 2024 и 2025 година – најнизок процент во последните 15 години. Гејтс нагласи дека тоа може да го загрози напредокот кој од 2000 година наваму ја преполови детската смртност и спасува околу пет милиони животи годишно.

Фондацијата Гејтс, основана во 2000 година, е еден од најголемите приватни финансиери на глобалното здравство, со акцент на борбата против заразни болести, спречување смрт на мајки и деца и намалување на сиромаштијата.

Гејтс веќе најави дека речиси целото свое богатство – проценето на околу 200 милијарди долари – ќе го донира до 2045 година, побрзо отколку што првично беше планирано, поради итните светски потреби.

На годишниот настан Goalkeepers, фондацијата ја додели наградата Global Goalkeeper на шпанскиот премиер Педро Санчез, истакнувајќи го неговиот ангажман и зголемувањето на шпанскиот придонес во Глобалниот фонд за 12% и во Алијансата за вакцини (GAVI) за 30%.