На 4 август Грант Де Свард, независен консултант за вештачка интелигенција од Источен Сасекс во Британија, забележал нешто чудно на својата платена сметка. Тој ден воопшто не работел, а потрошувачката на токени му растела сама. Следниот ден исклучил сè што било закачено на сметката и повторно не работел. Бројката пак се качила.

„Во најјасниот контролиран интервал, се качи од 45 на 55 отсто додека јас не извршив никаква работа“, вели Де Свард. Задачите биле паузирани или завршени, извршувањето во облак исклучено, ниту една активна локална задача не течела. Некој друг ја трошел неговата претплата.

Побарал список. Го немало.

Тука приказната станува поинтересна од обична кражба. Де Свард ја контактирал Anthropic и побарал разложена сметка – што точно ги троши неговите токени. Компанијата не му дала таков список, но се согласила дека нешто не чини. Ја суспендирала платената сметка, ги поништила сите сесии и сите серверски токени, и му вратила 44,49 фунти за преостанатото време од претплатата од 200 долари месечно.

Суспензијата му го запрела бизнисот. Де Свард живее од тоа да поставува агенти за мали и средни фирми – на пример, автоматско пренесување податоци од нарачки во сметководствен софтвер. И самиот работи преку истите алатки: администрација, дизајн на сајтови, кодирање. „Едноставно, сè денес ми оди преку вештачка интелигенција“, вели. Сметката му била вратена по околу две недели.

Кога Anthropic конечно го нашла виновникот, објаснувањето било дека компромитиран клуч од сесија бил искористен за да се создадат неовластени токени. Компанијата му кажала дека сметката „изгледала како да ја користи некој сомнителен трет сервис за да обработува активност за други луѓе“, но не можеле да утврдат како добил пристап. Со други зборови: некој влегол и месеци наназад можел тивко да го цица туѓиот пакет, бидејќи поддршката ја следи вкупната потрошувачка – но не и што ја троши.

Тоа е дупката, и таа не е техничка.

Де Свард го објавил случајот на Reddit и по 80 коментари сфатил дека не е сам. Еден корисник тврди дека неговата сметка „беше автоматски надградена без моја согласност, картичката ми беше наплатена, а потрошувачката скокна од 0 на 100 отсто без јас воопшто да ја допрам“. Друг видел како процентот оди од нула на 49 за дванаесет минути, откако направил само неколку прашања и едно пребарување. Трет тврди дека сметката му ја трошела целата дневна квота три дена по ред, без тој да ја отвори – и отворил пријава на GitHub, каде што повторно се јавиле луѓе со ист проблем.

Двајца објавиле мејлови во кои Anthropic сама ги предупредила. „Неодамна дознавме за напаѓач што користи вообичаен малициозен софтвер за крадење информации за да зема најавени сесии од компјутерите на луѓето, а потоа со нив пристапува до сметките и ја троши нивната квота“, стои во пораката. Компанијата ги одјавила корисниците, ги поништила овластувањата, вратила дел од парите и ги предупредила дека веројатно имаат зараза на компјутерот – која, како што нагласила, не доаѓа од самата платформа, туку од сè што се симнува и кликнува на интернет.

Де Свард таков мејл не добил. Тврди дека не нашол никаков доказ дека неговиот компјутер бил компромитиран и вели дека и денес не знае како влегле. Ја откажал претплатата и се префрлил на конкурентска алатка со поевтини модели. „Не е толку различно ниту подобро“, вели, и додава дека не гледа како би се вратил додека проблемот не се реши. На прашањето како корисниците да препознаат злоупотреба, компанијата одбила да коментира.

Од сето ова останува една реченица што вреди повеќе од целата приказна: „Не мислам дека овие луѓе имаат каков било начин да се заштитат.“ Плаќате 200 долари месечно за услуга што ја мери вашата потрошувачка до процент, но не може – или не сака – да ви каже што ја трошело. Секој оператор за струја, вода или мобилен интернет во регионов мора да ви испечати ставка по ставка. Овде тоа сè уште е нешто што се бара како услуга, а не се добива како право.