Францускиот претседател Емануел Макрон доживеа необична сцена во Њујорк, откако американската полиција му го блокираше патот непосредно по неговиот говор на Генералното собрание на Обединетите нации. Причината беше колоната на автомобили од делегацијата на американскиот претседател Доналд Трамп, која во тој момент минуваше низ улицата.

Макрон, кој претходно од говорницата во ОН објави дека Франција официјално ја признава палестинската држава, се обиде да ја напушти зградата, но беше запрен на самиот плочник. Еден полицаец љубезно му се обрати со зборовите: „Жал ми е, господине, сè е моментално блокирано“.

Во несекојдневниот момент, францускиот лидер го повика Трамп преку телефон и во шега му рече: „Погоди што, чекам на улица сега, затоа што сè е блокирано поради тебе“. По неколку минути ситуацијата беше расчистена, но само за пешаци, па Макрон продолжи пеш кон француската амбасада, сè уште разговарајќи со својот американски колега.

Овој инцидент предизвика внимание во медиумите бидејќи ретко може да се види претседател на светска сила како „заглавува“ во сообраќај. Но уште поважно, се случи токму по историската одлука на Франција да ја признае Палестина, чекор што предизвика бурни реакции на меѓународната сцена. Дел од светската јавност и дипломатската заедница го поздравија потегот како храбар и историски, додека Израел и САД изразија сериозна загриженост, предупредувајќи дека ваквиот потег може да биде контрапродуктивен за мировниот процес.