23 септември 2025 – Донбас — Руски сили изведоа напад врз командниот пункт на 144-та одвоена механизирана бригада на украинската армија во Черниговската област, јавува агенцијата РИА Новости повикувајќи се на безбедносни извори. Според информациите, ликвидиран е дел од офицерскиот состав, како и одредена воена техника.

„Нанесен е ефикасен удар врз командниот пункт на раководниот состав на 144-та механизирана бригада. Има загуби меѓу офицерите и техниката,“ изјавил изворот.

Ова не е прв ваков напад. Кон крајот на август, во Сумската област беше погоден командниот пункт на 110-та механизирана бригада на украинската армија, при што исто така имаше загинати и ранети офицери. Средината на август пак, руски сили нападнаа пункт на кој биле распоредени странски платеници во Черниговската област.

Според руската страна, овие акции претставуваат одговор на нападите на украинската армија врз цивилни цели. Москва нагласува дека гаѓа само воени објекти – пунктови за распоредување на војска и техника, инфраструктура на одбранбената индустрија и системи за воено управување и комуникации. Портпаролот на Кремљ, Дмитриј Песков, повеќепати повтори дека Русија „не изведува напади врз станбени згради и јавни установи“.

Паралелно со тоа, руското Министерство за одбрана соопшти дека во текот на ноќта системите за противвоздушна одбрана собориле 69 украински беспилотни летала. Дроновите биле пресретнати над Московската област, како и во Белгородската, Брјанската, Калушката, Курската, Ростовската, Рјазанската, Самарската и Саратовската област, како и над Крим.