При претрес во домот на 33-годишен скопјанец, полицијата пронашла арсенал што на граѓаните им е забранет. Рачна бомба „М75“, со вградени метални кугли со дијаметар од околу два милиметри, наменети за шрапнелско дејство. Пиштол „Црвена Застава“ калибар 7,65 милиметри, со рамка со седум куршуми. Пиштол „Берета“, со рамка со шест куршуми. Вкупно 240 куршуми од различен калибар. И, за комплет, околу седум грама марихуана.

Но најважниот предмет од претресот не пука. Во станот бил пронајден и клуч од мотор за кој, според Основното јавно обвинителство Скопје, постојат оперативни сознанија дека бил искористен при извршување кривично дело убиство. За кое убиство станува збор, кога се случило и каква е врската на осомничениот со него – обвинителството засега не кажува.

Против 33-годишникот е донесена наредба за спроведување истражна постапка за неовластено изработување, држење, посредување и тргување со оружје или распрскувачки материи и за неовластено производство и пуштање во промет на наркотични дроги. Обвинителот до судот предложи најстрога мерка – притвор, наведувајќи опасност од бегство и можност осомничениот да продолжи да врши кривични дела.

Рачна бомба во стан во главниот град не е украс. Таа е направена за шрапнелско дејство, да повреди сè што е околу неа. Колку вакви станови има низ Скопје во кои никој не влегол, затоа што никој не дошол со наредба за претрес? И кога ќе дознаеме кое убиство го отклучува клучот од тој мотор?