Spotify го затегнува семејниот пакет: кој не го скенира QR-кодот за седум дена, 12 месеци останува без семеен план

Spotify официјално го потврди она што медиумите го пишуваа со денови: семејниот пакет, Family Plan, повеќе нема да се дели толку лесно. На повикот со инвеститорите за третиот квартал, компанијата новата проверка ја нарече „рутинско подобрување“, а не затегнување. Изборот на зборови не е случаен.

Механизмот е едноставен. На телефонот на носителот на пакетот се појавува QR-код, а секој член мора да го скенира со својот телефон за да докаже дека живее заедно со носителот. За тоа има седум дена од известувањето. Кој ќе го пропушти рокот, 12 месеци не може да се приклучи на друг Family или Duo план, туку мора сам да си плаќа поединечна претплата.

Целта е јасна, без разлика како ја нарекуваат: возрасните деца што се одселиле и другарите што делат еден пакет треба да преминат на поскапиот Premium. Студент во Виена што слуша музика од пакетот на родителите во Скопје сега ќе мора за седум дена да се појави дома со телефонот – или да почне да плаќа сам.

Заедничкиот извршен директор Алекс Норстром на прашањето од инвеститор одговорил смирено. „Family Plan постои веќе долго. Мислам дека се близу 12, 13 години во историјата на Spotify и сочинува прилично значаен дел од нашата база на претплатници“, рекол тој. „Затоа е важно со текот на времето да ги подобруваме методите за верификација. Секако, со време се наоѓаат начини да се заобиколат. Кога тоа ќе се случи, смислуваме како да ги подобриме.“

Најважната реченица е дека проверката нема краен датум – според него, тоа е постојан процес. Преведено: Netflix прв ги стегна заедничките лозинки, Spotify сега го следи тој пример и нема намера да застане. Колку уште „рутински подобрувања“ ќе бидат потребни додека семејниот пакет не стане она што отсекогаш бил на хартија – пакет за едно семејство под еден покрив?