Мицкоски во кампања за вториот круг во Брвеница: кандидатот му благодари на премиерот за проектите, премиерот бара „да го заокружиме бројот 1“

Една рурална општина во Полошко, втор круг на локалните избори на 1 ноември и премиер на терен. Христијан Мицкоски вчера ги обиколи Дреново, Радиовце, Теново, Седларце и Брвеница, рамо до рамо со кандидатот на ВМРО-ДПМНЕ за градоначалник, Стојанчо Радичевски.

Радичевски им се заблагодари на гласачите од првиот круг и рече дека во вториот очекува уште поголема поддршка и победа. Но првата благодарност не ја упати до нив. „Најнапред сакам да му се заблагодарам на претседателот за поддршката за сите проекти што се во фаза на реализација“, рече кандидатот, објаснувајќи дека проектите во општината се реализираат „со поддршка од Владата и премиерот“.

Држава или партија?

Тука вреди да се застане. Претседателот на партијата е и премиер на државата, но буџетот од кој се финансираат проектите не е партиски. Кога кандидат за градоначалник во кампања му се заблагодарува на премиерот за проекти, пораката до гласачот е јасна и без да се изговори: од кого зависи дали ќе дојдат парите. Дали проектите ќе продолжат ако во Брвеница победи некој друг?

Мицкоски, пак, ја сврте приказната кон противниците. „Тие зборуваат за поделби по етничка линија, ние се обраќаме на сите граѓани овдека во општина Брвеница и зборуваме за заедништво“, рече тој, и додаде дека за другата страна изборите се „спас на нивните политички кариери“ што, според него, ќе бидат запаметени „по криминалот и поделбите“. Имиња не кажа, ниту понуди докази за тешкото обвинување.

Пораката ја заврши со изборна математика. Брвеница, вели, не праќа порака само за општината, туку „за цела Македонија“. И уште еден повик: „да го заокружиме бројот 1 и на 1-ви ноември да славиме заедно“. По 1 ноември, предупреди Мицкоски, „ќе дојде 2-ри ноември“ и некои „ќе заминат“. Што ќе остане во Брвеница од сите ветувања кога ќе заминат и камерите?