Кинеското Министерство за надворешни работи ги обвини Соединетите Американски Држави за сериозно кршење на меѓународното право откако САД пресретнаа танкер за нафта крај брегот на Венецуела што се движел кон Кина.

Венецуела има право да развива односи со други земји, изјави портпаролот на кинеското Министерство за надворешни работи Лин Џиан на дневната прес-конференција, додавајќи дека Кина се спротивставува на какви било „еднострани и нелегални“ санкции.

Американската крајбрежна стража пресретна втор танкер за нафта во меѓународните води крај брегот на Венецуела во саботата, неколку дена откако претседателот Доналд Трамп објави „блокада“ на сите санкционирани танкери за нафта што влегуваат и излегуваат од Венецуела.

Танкерот „Сенчурис“ натоварил нафта во Венецуела и носел околу 1,8 милиони барели венецуелска сурова нафта наменета за Кина, покажуваат документите.

Суровата нафта ја купил STOT, еден од многуте посредници вклучени во продажбата на нафта од државната нафтена компанија на Венецуела PDVSA на кинески независни рафинерии, покажуваат документите.

Портпаролката на Белата куќа изјави дека „бродот со лажно знаме“ носел санкционирана нафта и бил дел од тајната флота на Венецуела.

Венецуелската влада го осуди пресретнувањето на танкерот како „сериозен чин на меѓународно пиратство“. Кина е најголемиот купувач на сурова нафта од Венецуела, со околу четири проценти од нејзиниот увоз.