Над 30.000 луѓе го чистеа Скопје на 50 локации, а Градот најавува вакви акции двапати месечно

Повеќе од 30.000 луѓе, според градоначалникот Орце Ѓорѓиевски, повторно излегоа да го чистат Скопје – на над 50 локации низ градот. Ова беше четвртата голема екоакција што ја организира Градот, а планот е вакви „генералки“ да има двапати месечно.

Ѓорѓиевски денот го помина на Водно, со учениците. „Со секое подигнато парче отпад, овие деца одржаа голема лекција за одговорност, за совест и за љубов кон својот град“, напиша тој. Порака имаше и за другите: „Покажете дека го сакате Скопје со тоа што ќе го чувате“, им порача на оние што несовесно создаваат диви депонии.

Бројката е импресивна, а сликата од ученици со вреќи за ѓубре на Водно е убава. Но, акција што треба да се повторува двапати месечно не е повеќе акција – тоа е редовна услуга што ја вршат волонтери. Ако граѓаните го чистат градот на секои две недели, што тогаш прават комуналните служби и инспекциите во меѓувреме?

Ѓубрето на 50 локации не се појавило само. Некој го фрлил, некој го истурил од камион, некој не го однел. Учениците одржаа лекција, да. Прашањето е дали ја научија и оние што се плаќаат токму за ова – и оние што депониите ги прават.