Продажбата на станови падна за 14 отсто, изнајмувањето скокна за 45 отсто: стан од 63 квадрати во Центар отиде за околу 199.000 евра

Стан од 63 квадрати во скопски Центар, продаден од инвеститор, отиде за 12.243.373 денари – околу 199.000 евра, или 193.334 денари за квадрат. Во Карпош, стан од 41 квадрат во стара градба е продаден за 128.000 евра, по 192.000 денари за квадрат. Тоа се двете продажби што се издвојуваат во последниот квартален извештај на Агенцијата за катастар на недвижности. А извештајот покажува дека станови се купуваат сè помалку.

Од јули до септември бројот на продадени станови во државата паднал за 14 отсто во однос на вториот квартал, а нивната вкупна вредност за шест отсто. Кога бројот на продажби паѓа повеќе од вредноста, тоа значи повисока просечна сума по продаден стан. Тоа автоматски не значи дека цените растат, бидејќи зависи и од тоа кои станови се продавале, колку се големи и каде се. Но, од овие бројки не може да се заклучи ни дека становите поевтинуваат.

Кој не купува, изнајмува

Во исто време бројот на изнајмени станови скокнал за 45 отсто, а вкупната месечна закупнина за 31 отсто. Сликата е јасна и без многу анализа: помалку луѓе можат или сакаат да купат, повеќе луѓе плаќаат кирија.

Вкупно, во кварталот се регистрирани 7.679 трансакции со недвижности, 8,2 отсто помалку од претходниот. Купопродажбите се намалиле за 12,1 отсто, договорите за закуп пораснале за 2,8 отсто. Вредноста на пазарот изнесувала 339 милиони евра, од кои 337,8 милиони се купопродажби, а 1,1 милион закупи. Најмногу купопродажби имало во општина Центар, 562, што е два отсто помалку од претходниот квартал. Од Катастарот оценуваат дека двата сегмента на пазарот се движат во различни насоки.

Пазарот, значи, се лади по бројот на договори, но не и по сумата што се плаќа за стан. Ако купувањето станува сè поретко, а вкупната кирија расте речиси за една третина за три месеци, кој ќе го плати домот на следната генерација?