Риз Витерспун ја откупува продукциската куќа што ја продаде за 900 милиони долари: според специјализираните медиуми, сега вреди најмногу 50 милиони

Летото 2021 година Риз Витерспун ја продаде својата продукциска куќа Hello Sunshine за околу 900 милиони долари и преку ноќ стана најбогатата актерка на светот. Лично на неа ѝ припаднаа околу 120 милиони. Пет години подоцна, таа ја откупува компанијата назад – а според специјализираните медиуми, цената е најмногу 50 милиони долари.

Купувачите беа двајца инвеститори кои денес ја сочинуваат компанијата Candle, поддржана од фондот Blackstone: Кевин Мејер и Том Стагс, поранешни извршни директори во Disney и TikTok. Блиски извори на Candle за порталот The Wrap признале дека зделката не била добра во споредба со платената цена – ниту за нив, ниту за Blackstone. Преведено од корпоративен јазик: некој платил за сон, а добил табела со црвени бројки.

Падот е видлив и во канцелариите. Според истиот портал, за еден викенд е отпуштена половина од персоналот. Најмногу настрадале секторите за потрошувачи и продажба, а најмалку филмската и телевизиската продукција, книжевниот клуб, социјалните мрежи и маркетингот. Компанијата одби да коментира.

А каталогот не е мал. Hello Sunshine стои зад „Big Little Lies“, каде што Витерспун глумеше со Никол Кидман, Лора Дерн, Шејлин Вудли и Зои Кравиц, зад минисеријата „Daisy Jones & The Six“ со Рајли Кио и Сем Клафлин, како и зад неодамнешната серија „Elle“, преднаставка на филмовите Legally Blonde, кои ја направија славна.

Делот што најмалку настрада е, парадоксално, најстариот формат – книгата. Reese’s Book Club работи од 2017 година: Витерспун секој месец избира наслов за дискусија со следбениците, а многу од избраните книги стануваат бестселери. Голем дел од нив се од авторки, профилот на Инстаграм има над три милиони следбеници, а клубот донесе и рекламни договори, меѓу другите со Apple. За ноември изборот е „The Great Wherever“ од Шенон Сандерс.

Приказната е позната и надвор од Холивуд: проценки што летаат високо додека трае еуфоријата, а слетуваат кога некој ќе праша колку всушност заработува бизнисот. Од 900 на 50 милиони долари за пет години – дали е ова пропаст на една империја или само враќање на реалната цена? Витерспун, во секој случај, повторно го зема своето име под своја контрола, и тоа за мал дел од она што го наплати.