📅 25 септември 2025

Осум загинати и 142 повредени во израелските напади врз Сана

Во израелските воздушни напади врз Сана, главниот град на Јемен под контрола на бунтовниците Хути, загинаа осум лица, а 142 се повредени, соопштија вечерва властите на Хутите со нов биланс на жртвите.

Првичните извештаи говореа за двајца загинати и неколку десетици повредени.

Нападите се случија откако Хутите ја презедоа одговорноста за ракетниот напад изведен во средата врз јужен Израел.

Портпаролот на Министерството за здравство на Хутите, Анис Аласбахи, изјави на социјалната мрежа X дека бројот на жртви „се искачи на осум маченици и 142 ранети“. Во меѓувреме, спасувачките екипи продолжуваат со потрагата по преживеани под урнатините.