Sot, 26 shkurt, mbushen 22 vjet që kur ish-presidenti i Maqedonisë Boris Trajkovski humbi jetën në aksidentin ajror pranë Rotimllës, tek Mostari, në Bosnjë dhe Hercegovinë.

Tragjeida ndodhi më 26 shkurt 2004, kur avioni qeveritar "Kingair" (Beechcraft King Air) u rrëzua gjatë afrimit drejt aeroportit të Mostarit në kushte të rënda atmosferike — mjegull e dendur dhe re të ulëta. Në aksident humbën jetën nëntë persona — presidenti Trajkovski, katër anëtarë të kabinetit të tij (Dimka Ilkova-Boshkoviq, Risto Blazhevski, Anita Krishan Lozanovska), përfaqësuesi i Ministrisë së Punëve të Jashtme Mile Krstevski, dy oficerë sigurie dhe dy pilotë.

Mbeturinat e avionit u gjetën 24 orë pas aksidentit, në zonën Matinj Brdo pranë fshatit Huskovici. Avioni udhëtonte drejt konferencës ndërkombëtare për investime në Bosnjë dhe Hercegovinë.

Hetimi i autoriteteve maqedonase dhe bosnjake përfundoi se aksidentin e kishin shkaktuar "gabime të ekuipazhit gjatë afrimit në kushte të rënda atmosferike" dhe "dobësi të caktuara sistemike". Hetim ndërkombëtar i kryer në vitin 2013 arriti në përfundime të ngjashme.

Boris Trajkovski lindi më 25 qershor 1956 në Strumicë. Shërbeu si president i dytë i Maqedonisë nga 15 dhjetori 1999 deri në vdekje. Para mandatit presidencial, kishte qenë zëvendësministër i Punëve të Jashtme.

Ngjarje përkujtimore u mbajtën sot në Shkup, Strumicë dhe Rotimlle, ku familja dhe delegacionet zyrtare vendosën lule në përmendoret.