Apple ka paditur OpenAI për vjedhje sekretesh tregtare dhe shkelje kontrate - dhe kjo nuk është një grindje e zakonshme ligjore mes dy kompanive, por përplasja e parë e hapur mes prodhuesit të iPhone-it dhe kompanisë që do ta zëvendësojë atë.

Padia, e paraqitur në një gjykatë federale në Kaliforninë e Veriut, pretendon se OpenAI ka punësuar në mënyrë sistematike njerëz nga Apple dhe i ka nxitur të mbanin me vete informacione konfidenciale. Sipas Apple, skemën e drejtuan njerëzit e majës të OpenAI, përfshirë drejtorin e harduerit Tang Tan - një njeri që kaloi 24 vjet në Apple, së fundmi si zëvendëspresident për dizajnin e produkteve për iPhone dhe Apple Watch.

Akuzat janë konkrete dhe të pakëndshme: Tan gjoja përdorte emrat sekretë koduar të projekteve të Apple ndërsa rekrutonte kuadro, u kërkonte kandidatëve për punë të sillnin komponentë harduerike të Apple në intervistë, dhe i këshillonte punonjësit që largoheshin se si t'i anashkalonin procedurat e sigurisë të kompanisë. Nëse është e vërtetë, ky nuk është një kalim i rastësishëm talentesh nga një firmë në tjetrën, por një gjueti e organizuar për sekretet e të tjerëve.

Pse pikërisht tani? Sepse OpenAI, sipas thashethemeve, po ndërton produktin e vet të parë harduerik - një pajisje që me shumë gjasa do të përplaset drejtpërdrejt me iPhone-in. Analisti Ming-Chi Kuo qysh në prill njoftoi se bëhet fjalë për një telefon që në vend të aplikacioneve do të mbështetej te agjentët e IA. Për Apple, të ardhurat kryesore të të cilit prej dekadash vijnë nga iPhone, kjo është një nga kërcënimet më të mëdha deri tani.

Sfondi e bën historinë edhe më interesante: vitin e kaluar OpenAI bleu startapin io të ish-dizajnerit kryesor të Apple, Jony Ive, për 6,5 miliardë dollarë, pikërisht për ta ndihmuar në ambiciet harduerike. Pra, OpenAI tashmë ka mbledhur një mendje kyçe nga Apple ligjërisht, përmes blerjes. Pyetja që gjykata do të zgjidhë është nëse pjesa tjetër e talentit mbërriti nga e njëjta rrugë - apo nga dera e pasme.