Vrasje pranë Parlamentit Evropian dhe një polic i qëlluar për vdekje brenda një nate: Brukseli numëroi 57 të shtëna për shtatë muaj

Natën mes 12 dhe 13 tetorit, në Bruksel humbën jetën dy persona në dy të shtëna të veçanta. E para ndodhi në komunën Ixelles, disa hapa larg ndërtesës së Parlamentit Evropian. Një person u vra, gjykatësi hetues doli në vendngjarje, ndërsa policia për momentin nuk thotë as kush është viktima, as cili ishte motivi.

E dyta është edhe më e vështirë për t'u tretur. Në periferinë Jette, një patrullë policore u përpoq të ndalte një veturë të vjedhur, ndërsa i dyshuari hapi zjarr. Një polic u godit në kokë, u dërgua urgjentisht në spital dhe atje ndërroi jetë. Ai ishte pjesëtar i brigadës së specializuar për luftimin e sulmeve të dhunshme në zonën policore Bruksel-Ixelles, njësi që dërgohet në ndërhyrjet me rrezikun më të lartë.

Policia speciale më vonë arrestoi një të dyshuar, ndërsa në veturën e vjedhur u gjetën tri armë zjarri. Dikush në një veturë të vjedhur, me tri armë brenda, vendosi se është më mirë të qëllojë mbi një polic sesa të ndalet. Nga ky fakt duhet të fillojë çdo histori për këtë natë - gjithçka tjetër vjen pas.

Ministri i Punëve të Brendshme Bernard Quintin deklaroi se vdekja e policit e ka tronditur thellë dhe tha se përgjegjësit do të përballen me „forcën e plotë të ligjit“. Kryetari i Brukselit, Philippe Close, e vizitoi vendin e tragjedisë në Jette dhe paralajmëroi për rreziqet ndaj të cilave policët janë të ekspozuar çdo ditë. Nëse dy të shtënat janë të lidhura, autoritetet për momentin nuk e dinë, ndërsa prokuroria paralajmëroi konferencë për shtyp.

Deklaratat janë të pritshme, por shifrat thonë më shumë. Sipas policisë federale belge, në shtatë muajt e parë të vitit 2026, në 19 komunat e rajonit të Brukselit janë regjistruar 57 të shtëna, me dy të vdekur dhe 21 të lënduar. Gjatë gjithë vitit 2025 pati 101 të shtëna, tetë të vdekur dhe 43 të lënduar. Një pjesë e madhe e tyre lidhen me tregtinë e drogës dhe hakmarrjet mes grupeve kriminale.

Ky është qyteti në të cilin shkruhen raportet për sundimin e ligjit për të gjitha vendet kandidate për anëtarësim, përfshirë Maqedoninë. Askush nuk e kontestion se Brukseli ka të drejtë t'u kërkojë rend të tjerëve. Por kur disa hapa larg Parlamentit qëllohet, ndërsa një polic vdes gjatë ndjekjes së një veture të vjedhur, pyetja imponohet vetvetiu: kush i shkruan raportet për Brukselin?