Irani pohon: cisterna e tretë u përplas me minë në ngushticën e Hormuzit, ndërsa Trump do ta riemërtonte „Ngushtica e Trumpit“

Garda Revolucionare iraniane pohon se edhe një supercisternë, me kapacitet prej dy milionë fuçish nafte, është përplasur me minë në ngushticën e Hormuzit. Shpërthimi, sipas kumtesës së tyre, e goditi pjesën e motorëve të anijes. Ky është incidenti i tretë i tillë që nga e shtuna, 10 tetor, thonë nga ushtria iraniane. Emrat e tri cisternave, flamujt dhe pronarët e tyre nuk janë publikuar - prandaj mbetet i pakonfirmuar edhe pohimi se të treja janë në pronësi të kompanive amerikane, si dhe se janë shkatërruar plotësisht.

Versioni iranian është i qartë dhe kërcënues. Cisterna e fundit, sipas Teheranit, u përpoq të kalonte nëpër ngushticë me sistem navigacioni të fikur dhe në një rrugë për të cilën nuk kishte miratim iranian. Garda paralajmëroi se anijet që i fikin sistemet e identifikimit automatik dhe i shmangin drejtimet e përcaktuara do të trajtohen si armiqësore. Teherani që nga korriku këmbëngul që cisternat të kalojnë nëpër ngushticë vetëm me miratimin e tij dhe nëpër korridore të caktuara posaçërisht.

Nga ana tjetër qëndron bllokada amerikane. Komanda Qendrore amerikane (CENTCOM) njoftoi se më 10 tetor një aeroplan luftarak e goditi pjesën e pasme të anijes tregtare „Ocean Molika“, e njohur edhe si „Arika Sun“, që lundron nën flamur panamez, dhe ia paaftësoi sistemin lëvizës - sepse ekuipazhi i injoroi paralajmërimet dhe u përpoq ta çante bllokadën detare të Iranit. Sipas të dhënave amerikane, që nga rivendosja e bllokadës në korrik janë paaftësuar katër anije tregtare, edhe 135 janë detyruar ta ndryshojnë kursin, ndërsa janë shkatërruar dhjetë cisterna të lidhura me rrjetin e Gardës Revolucionare. Amerikanët pohojnë edhe se më herët i kanë larguar minat iraniane nga rrugët ndërkombëtare detare.

Shërbimi britanik për monitorimin e trafikut detar UKMTO konfirmoi edhe një incident të dielën: një cisternë e goditur në anën e majtë nga një predhë e paidentifikuar. Anija është dëmtuar, ekuipazhi është i sigurt, ndotje nuk ka - por UKMTO nuk konfirmoi se bëhet fjalë për minë. Konfirmim i pavarur për tri minat iraniane deri tani nuk ka.

Ndërkohë, Donald Trump në një fjalim në Tenesi më 10 tetor deklaroi se Irani ndoshta po përgatit intensifikim të sulmeve para zgjedhjeve për Kongres më 3 nëntor, duke besuar se kjo politikisht do t'u dëmtojë republikanëve. „Me siguri do të provojnë diçka shtesë para zgjedhjeve, duke menduar se kjo do të na dëmtojë. Por ne mund ta përfundonim gjithë këtë shumë shpejt“, tha ai. Pastaj shtoi: „Po mendojmë ta riemërtojmë Ngushtica e Trumpit.“

Diplomacia deri tani ecën në vend. Sekretari i Këshillit Suprem iranian për Siguri Kombëtare, Mohsen Rezai, deklaroi se përgjigjja amerikane ndaj shtatë kushteve iraniane për hapjen e ngushticës nuk është e kënaqshme. Teherani kërkon që Uashingtoni t'i pranojë qartë kushtet e mbetura para se të lejojë normalizimin e trafikut detar. Një nga rrugët më të rëndësishme të naftës në botë kështu mbetet peng i dy flotave dhe i një llogarie zgjedhore amerikane. Kush këtu në të vërtetë e mbron lundrimin e lirë?