Pesë shërbime evropiane të inteligjencës paralajmërojnë: Rusia planifikon atentate ndaj drejtorëve të firmave që i ndihmojnë Ukrainës

Rusia po i forcon operacionet e fshehta në gjithë Evropën, ndërsa shërbimet e saj gjithnjë e më seriozisht po mendojnë për atentate ndaj drejtorëve të kompanive të mbrojtjes dhe civilëve të tjerë të lidhur me ndihmën ushtarake për Ukrainën. Paralajmërimi vjen nga shërbimet e inteligjencës të pesë vendeve evropiane, njoftuan mediat perëndimore.

Sipas vlerësimeve të tyre, synimi i Moskës është ta dobësojë ndihmën ushtarake për Kievin në një moment kur përparimi rus në front është ngadalësuar, ndërsa ekonomia ruse është nën presion gjithnjë e më të madh. Në qendër të paralajmërimeve është shërbimi ushtarak i inteligjencës GRU, i cili qëndron pas një vargu operacionesh të fshehta në territorin evropian. Në listën e objektivave të mundshme janë zyrtarë të lartë dhe drejtorë të firmave të mbrojtjes - përfshirë edhe prodhues më të vegjël dronësh dhe kompani që e furnizojnë drejtpërdrejt Ukrainën me pajisje ushtarake.

Shërbimet gjermane të sigurisë tashmë i kanë forcuar kontaktet me industrinë e mbrojtjes, ndërsa një pjese të drejtorëve u kanë rekomanduar mbrojtje personale shtesë, përfshirë edhe sigurim privat. Frika nuk është teorike. Shërbimet amerikane dhe gjermane që në vitin 2024 zbuluan një plan rus për vrasjen e Armin Pappergerit, drejtorit ekzekutiv të prodhuesit gjerman të armëve Rheinmetall, një nga furnizuesit e rëndësishëm evropianë me armë për Ukrainën. E reja është se kërcënimi nuk ndalet më te emrat e mëdhenj: objektiva bëhen edhe firma të vogla, prodhimi i të cilave ndikon drejtpërdrejt në mbrojtjen ukrainase.

Spiunë nga Telegrami

Përveç kërcënimeve me atentate, shërbimet evropiane regjistrojnë gjithnjë e më shumë sabotime, sulme kibernetike dhe përpjekje për të penguar rrugët nëpër të cilat pajisjet ushtarake arrijnë në Ukrainë. Shërbimi danez i inteligjencës PET paralajmëroi se Rusia gjithnjë e më shpesh përpiqet të godasë kompani konkrete të mbrojtjes. Metoda është pothuajse banale: përmes rrjeteve sociale dhe aplikacioneve si Telegrami rekrutohen njerëz për detyra të thjeshta - të fotografojnë një fabrikë, një magazinë apo një automjet. Ata zakonisht nuk kanë asnjë përvojë inteligjence, i motivojnë paratë. Fotografitë pastaj shërbejnë për përgatitjen e sabotimeve.

Sa para mjaftojnë që dikush të fotografojë një fabrikë pa pyetur pse?

Agjentët evropianë të inteligjencës vlerësojnë se Moska dëshiron të arrijë disa gjëra njëkohësisht: ta pengojë prodhimin dhe dërgimin e armëve, t'i frikësojë drejtorët dhe punonjësit, t'i rrisë shpenzimet për mbrojtjen e tyre, të mbjellë pasiguri mes popullsisë evropiane, t'i ndajë anëtaret e NATO-s dhe ta dobësojë mbështetjen politike për Ukrainën. Një pushtim të madh konvencional rus të territorit të NATO-s shërbimet për momentin nuk e konsiderojnë të afërt. Por operacionet hibride, paralajmërojnë ata, po bëhen gjithnjë e më intensive dhe më të rrezikshme.

Moska rregullisht i hedh poshtë akuzat se qëndron pas sabotimeve dhe përpjekjeve për atentate në Evropë. Por kur pesë shërbime evropiane ngrenë alarmin, ndërsa shërbimet gjermane u rekomandojnë drejtorëve sigurim privat, pyetja nuk është më nëse kjo luftë e ka kaluar kufirin e Ukrainës - por sa thellë ka hyrë tashmë në Evropë.