Gjatë fundjavës vdiq edhe një pacient me ethet e Nilit Perëndimor - një 61-vjeçar me sëmundje shoqëruese serioze. Me këtë numri i të vdekurve arriti në tre. Laboratorikisht janë konfirmuar 35 raste, edhe tre janë në proces diagnostikimi, ndërsa gjashtë janë në gjendje kritike në kujdesin intensiv.

Drejtori i Klinikës për Sëmundje Infektive, Fadil Cana, tha diçka më të rëndësishme se shifrat: kufiri i moshës po zhvendoset. Të gjashtë rastet kritike janë mbi 60 vjeç, por pacienti më i ri i hospitalizuar me formën neuroinvazive është 25 vjeç, në gjendje stabile.

Një përqind, por ai përqind dhemb

Formën neuroinvazive e zhvillojnë rreth një përqind e të sëmurëve. Simptomat janë temperaturë e lartë, dhimbje koke e fortë, qafë e ngurtë, çorientim, konfuzion. Të tjerët kalojnë pa simptoma ose me pamje të lehtë - që do të thotë se numri real i të infektuarve është më i madh se 35, thjesht askush nuk shkon në test kur nuk ka arsye.

Ministri i Shëndetësisë Sasho Klekovski theksoi se Athina aktualisht është ndër zonat më aktive në Evropë, me 81 raste të regjistruara të formës neuroinvazive dhe nëntë raste vdekjeje. Raste ka tashmë edhe në zonat kufitare me Maqedoninë. Mushkonja nuk kërkon pasaportë.

Nga 40 analiza në vit në tetë në ditë

Këtu ka një të dhënë që tregon sa i papërgatitur ishte sistemi. Vitet e kaluara bëheshin rreth 40 analiza në vit. Tani kryhen mes katër dhe tetë - në ditë. Për diagnozë përfundimtare nevojiten dy teste të pavarura.

Kapaciteti, pra, u shkallëzua pasi sëmundja tashmë ishte këtu. Pyetja nëse mund të bëhej më herët është retorike çdo verë.

Pishinat, satelitët dhe apeli që vështirë do të dëgjohet

Klekovski njoftoi se përmes fotografive satelitore dhe kartografike janë vërejtur pishina të shumta dhe sipërfaqe të tjera ujore në vendbanimet ku është shpallur epidemia. Prej andej edhe apeli - qytetarët t'i zvogëlojnë sipërfaqet ujore, përfshirë edhe pishinat rekreative.

„Është vështirë në kushte temperaturash të larta të presim që njerëzit t'i zbrazin pishinat, megjithatë duhet të apelojmë për kujdes maksimal”, porositi ministri. Fjalia vetë ia pranon kufirin: në një javë kur temperaturat kalojnë 40 gradë, apeli për zbrazjen e pishinës është thirrje në boshllëk.

Epidemia në Shkup u shpall më 12 gusht në Kisella Vodë, Gazi Babë, Aerodrom, Butel dhe Ilinden, me theks të veçantë në Draçevë, Përzhinë, Lisiçe të Poshtme, Kadino dhe Jurumleri.

Ku jeton pacienti nuk është ku u infektua

Klekovski nënvizoi një dallim që hartat mediatike zakonisht e fshijnë. Inkubacioni zgjat nga tre deri në 14 ditë, prandaj të gjithë pacientët kalojnë anketë epidemiologjike - a kanë udhëtuar, ku janë lëvizur. Ka njerëz me adresa urbane që me shumë gjasë janë infektuar në shtëpi fundjave.

Kjo do të thotë se masat duhet të shkojnë atje ku është vendi i mundshëm i infektimit, e jo atje ku njeriu ka letërnjoftimin. Inspektorati Shtetëror Shëndetësor dhe Sanitar tashmë ka bërë kontroll të jashtëzakonshëm të zbatimit të elaborateve për spërkatje në të gjitha komunat e Rajonit të Shkupit. Rezultatet sapo do të njoftohen.

Kjo është fjalia që ia vlen të mbahet mend. Spërkatja është detyrim që komunat e paguajnë çdo vit, me elaborat. Nëse kontrolli tregon se diku nuk është zbatuar ashtu siç qëndron në letër, atëherë kjo verë nuk do të jetë vetëm histori shëndetësore, por edhe inspektuese.