Florida dhe Teksasi i kthejnë shpinën firmës Flock - kompanisë kamerat e së cilës lexojnë targat e automjeteve. Departamenti i Transportit i Floridës të hënën dërgoi një shkresë me të cilën ndërpritet përdorimi i këtyre lexuesve nëpër autostradat shtetërore, duke përmendur „raporte shqetësuese për keqpërdorim, probleme me privatësinë e të dhënave dhe skema përndjekjeje“. Shteti ka 30 ditë t'i heqë kamerat.

Vendimi vjen disa ditë pasi guvernatori i Floridës, Ron Desantis, në një konferencë shtypi teknologjinë e quajti „jashtë kontrollit“. Teksasi e bëri të njëjtën lëvizje javën e kaluar, duke u urdhëruar organeve shtetërore të ndalin financimin e rrjetit. Kabineti i guvernatorit Greg Abot iu referua keqpërdorimit të sistemit.

Një rast e shpjegon gjithë çështjen. Një polic nga Lafkini i Teksasit është akuzuar në njëqind pika për vepra të rënda penale, të lidhura me kërkime të pretenduara nëpër bazën e Flock-ut për të përndjekur njerëz pa autorizim. Nuk është haker nga jashtë. Ky është një njeri me qasje të ligjshme që e përdori si i erdhi për shtat.

Dhe ky nuk është rast i izoluar. Janë raportuar lëshime sigurie, policë që qasjen e përdorën për t'i përndjekur ish-partneret, dhe gabime në njohje që përfunduan me ndalimin e vozitësve të pafajshëm dhe arrestime të gabuara. Sipas publikimeve më të reja, kamerat nuk ndalen më vetëm te targat - punohet edhe në njohjen dhe përndjekjen e njerëzve.

Rrjeti numëron rreth 130.000 lexues nëpër SHBA. Pjesa më e pazakontë e historisë janë qytetet që donin të dilnin: Evanstoni në Ilinois, Kembrixhi në Masaçusets dhe Juxhini në Oregon raportuan se kamerat u rivendosën ose u riaktivizuan pasi autoritetet lokale tashmë e kishin shkëputur kontratën. Firma nuk iu përgjigj pyetjes a do t'u lejojë dy shteteve t'i heqin pajisjet.

Kundërshtimi vjen edhe nga republikanët edhe nga demokratët, çka në Amerikën e sotme është rrallësi që vlen të shënohet. Kur dy parti që nuk pajtohen për asgjë gjenden në të njëjtën anë, kjo zakonisht do të thotë se çështja pushoi së qeni ideologjike dhe u bë praktike - kamera e regjistron automjetin e secilit, pavarësisht për kë ka votuar pronari.

Nëse dikush kërkon një mësim që udhëton përtej oqeanit, ai nuk është te numri i kamerave por te radhitja. Së pari vendoset sistemi, pastaj merret vesh kush ka qasje, dhe vetëm në fund - kur dikush tashmë të jetë akuzuar - shtrohet pyetja kush e mbikëqyrte fare mbikëqyrjen. A do të pyesnim te ne më herët?