Meta nis pajtimet e para globale me pagesë për Instagram, Facebook dhe WhatsApp - hap që kompania e paraqet si "prioritet për përdoruesit e rinj", por në praktikë është pranim se rritja e të ardhurave nga reklamat po shterohet. Çmimet: Instagram Plus dhe Facebook Plus me 3,99 dollarë në muaj, WhatsApp Plus me 2,99 dollarë.

Çfarë marrin pajtimtarët? Analitikë për story, jetë të zgjatur të story-t (24 orë më shumë), shikim të padukshëm story-sh, postim drejtpërdrejt nga profili, ikona dhe fonte të personalizuara për bio-në. WhatsApp Plus ofron tema të personalizuara për aplikacionin, tone zilesh dhe sticker. Me fjalë të tjera - funksione që çdo aplikacion i ngjashëm i ka tashmë falas, të paketuara në pajtim.

Më ambicioz janë planet AI që po testohen në Singapor, Guatemalë dhe Bolivi: Meta One Plus me 7,99 dollarë dhe Meta One Premium me 19,99 dollarë në muaj, me model më të mirë dhe me më shumë fuqi kompjuterike. Për krijuesit dhe bizneset, testimi në Arabinë Saudite, Marok, Tajlandë dhe Bangladesh ofron plan nga 14,99 deri në 49,99 dollarë - me çertifikim, mbrojtje nga profilet e rreme dhe forcim në algoritëm.

Poenta e Metës është e qartë: kompania ka tashmë 3,5 miliardë përdorues. Kur nuk mund të rritesh në gjerësi, rritesh në thellësi - paguaj ata që janë tashmë aty. Pyetja për Ballkanin: sa përdorues do të paguajnë 4 dollarë në muaj për më shumë kontroll mbi story-t? Ndoshta pak, të paktën derisa funksionet të bëhen kusht në vend të shtesës.