Netflix po mendon për kanale televizive që punojnë 24 orë - një kthim te pikërisht ajo prej së cilës të gjithë iknin

Netflix, platforma që prej vitesh na mësoi të shikojmë çfarë duam dhe kur duam, tani po mendon për diçka që tingëllon si një hap prapa në kohë - kanale televizive që punojnë pandërprerë, 24 orë në ditë, ku thjesht e ndez dhe e lë të ecë.

Planet i publikoi Wall Street Journal. Ideja është të kthehet zakoni i një televizori vazhdimisht të ndezur në prapavijë - pikërisht e kundërta e modelit të shikimit „binxh“ që e popullarizoi Netflix. Netflix deri tani nuk ka dhënë koment zyrtar.

Pse do të kthehej giganti i strimingut te një format klasik TV? Përgjigjja është te shifrat dhe te reklamat. Pjesa e Netflixit në shikimin e përgjithshëm të TV-së në prill ra në 7,8 përqind, kurse shenjat e rënies së aktivitetit e shtyjnë të kërkojë mënyra për t'i mbajtur shikuesit më gjatë. Këtu vjen motivi i dytë, më i rëndësishmi: përmbajtja live do të thotë reklama që nuk mund t'i kapërcesh. Për biznesin e reklamave të Netflixit, kjo është ar.

Ky nuk është eksperimenti i vetëm. Kompania tashmë ka testuar video të shkurtra, video-podkaste dhe një aplikacion të veçantë lojërash për fëmijë, dhe gjoja po negocion edhe për blerjen e Letterboxd - rrjetit social për dashamirësit e filmit. Po shqyrtohen edhe pako me shërbime të tjera, ngjashëm me atë që ofrojnë Apple dhe Amazon.

Historia thotë diçka më të gjerë për tërë industrinë. Strimingu premtoi liri nga skema programore e televizionit dhe nga reklamat, e tani pikërisht ata gigantë të strimingut po i kthejnë të dyja ngadalë. Kur „e ardhmja e televizionit“ nis të ngjajë gjithnjë e më shumë me televizionin prej të cilit të gjithë iknin, ia vlen të pyetet - çfarë saktësisht ndryshoi, përveç asaj se kujt i paguajmë paratë?