Ari këtë sezon doli nga kutia e bizhuterive dhe u zhvendos në garderobë. Jo si detaj, por si ngjyrë e plotë e veshjes. Koleksionet për pranverë dhe verë 2026 janë plot me tone metalike, ndërsa brende si Balmen, Emilio Puçi dhe Shanel e bartën efektin e shkëlqimit edhe te materialet e thurura, që do të thotë se ari nuk është më i rezervuar për pas orës tetë të mbrëmjes.

Eksperta e kolorimetrisë Ljedo Visenti ka një shpjegim që është më interesant se vetë trendi: „Na kujton automatikisht dritën e diellit, shkëlqimin, vitalitetin dhe ndriçimin. Përveç kësaj, ka lidhje shumë të afërt me idenë e lëkurës së nxirë, diçka që tradicionalisht e lidhim me këtë sezon." Me fjalë të tjera, veshja e artë nuk shitet si veshje, por si vazhdim i verës mbi trup.

Këtu është momenti për skepsë

Kjo ngjyrë është një nga më të shtrenjtat për prodhim kur bëhet mirë dhe një nga më të lirat kur bëhet keq. Dallimi mes një materiali që e kap dritën dhe një materiali që duket si letër dekorimi është i madh për syrin, ndërsa shpesh i vogël në etiketë. Industria e modës çdo sezon gjen mënyrë t'i shpallë të skaduara copat e vjetra, ndërsa këtë herë vegla është një ngjyrë që fjalë për fjalë nuk mund ta injorosh.

Prandaj pjesa më praktike e gjithë trendit nuk është fustani, por aksesorët. Nëse ari në dozë të plotë nuk është për këdo, dhe nuk është, kombinimi zgjidhet me çantë, vathë ose sandale. Ky është edhe versioni i vetëm i trendit që nuk kërkon garderobë të re, dhe versioni për të cilin industria flet më së paku.

Portokallia si pjesa e dytë e së njëjtës histori

Përveç së artës, në modë është edhe portokallia. Visenti sërish e lidh këtë me psikologjinë, jo me prerjen: „Nga psikologjia e ngjyrës, këto tone lidhen me ndjenja që asociojnë verën. Portokallia lidhet me energjinë, kreativitetin, aventurën, argëtimin dhe entuziazmin. Prandaj në një periudhë që e lidhim me pushimin dhe mirëqenien, kjo ngjyrë merr rol të veçantë." Pra na shitet një humor, ndërsa faturën e paguajmë me copa veshjeje.

Këshilla praktike për ata me nëntonalitet të ftohtë të lëkurës është të përziejnë metalet. Kombinimi ar dhe argjend jep baraspeshë dhe shkëlqim që i shkon fytyrës, në vend që ta hajë. Rregulli që vlente me dekada, se metalet nuk përzihen, ra prej kohësh dhe mirë që ra.

E nëse doni gjithë trendin falas, shikoni nga sanduku. Copat e qëndisura me fill të artë në anët tona ekzistojnë me breza dhe kurrë nuk hynë në asnjë koleksion sezonal sepse kurrë nuk dolën prej tij. Ndonjëherë trendi më i shtrenjtë i sezonit tashmë rri diku i palosur, dhe gjithçka që kërkon është dikush ta nxjerrë.