ZOIL Maqedonia nuk ekziston më nën atë emër. Kompania e sigurimeve quhet Alta Sigurime, selia zhvendoset nga Manastiri në Shkup, ndërsa pronar është biznesmeni serb Davor Macura - me njëqind për qind të aksioneve me të drejtë vote.

Tri ndryshime në një vit: pronari, emri, adresa. Asnjëra prej tyre nuk është e rastësishme.

Shifrat e transaksionit

Ndryshimet pasuan një bllok-transaksion të realizuar në prill të këtij viti, me të cilin u krye shitblerja e gjithë paketës prej 60.000 aksionesh, në shumën prej 104.881.800 denarësh - rreth 1,7 milionë euro.

Pronari i ri pastaj nuk u ul mbi blerjen. Në qershor Komisioni për letra me vlerë dha miratimin për emetimin e dytë të aksioneve në vlerë prej 1,3 milionë eurosh - 26.000 aksione të zakonshme me 50 euro vlerë nominale dhe shitjeje. Aksionet i mori dhe i pagoi aksionari i vetëm.

Pra: 1,7 milionë për kompaninë, plus 1,3 milionë kapital i freskët i hyrë menjëherë. Te një kompani sigurimesh e themeluar sapo në vitin 2023, një rikapitalizim thuajse sa vetë çmimi i blerjes nuk është kozmetikë - është përgatitje për rritje të portofolit.

Kush është pronari i ri

Davor Macura nuk është i panjohur në sektorin financiar rajonal. Ai është kryetar aktual i Këshillit Mbikëqyrës të Alta bankës Beograd, si dhe i Alta lizing Beograd, dhe kryetar e përfaqësues i Shoqatës së këmbyesve të Serbisë dhe Beogradit.

Sipas biografisë së publikuar përmes Bursës Maqedonase, diplomoi ekonomi në Universitetin „Edukons Sremska Mitrovica" në 2014, magjistroi në 2016 në Universitetin „Union - Nikolla Tesla" në Beograd, ndërsa doktoroi në menaxhment dhe biznes në 2022 në Universitetin „MB" në Beograd.

Emri „Alta" nuk është zgjedhur rastësisht. Tashmë ekziston Alta banka Manastir, Alta banka Beograd, Alta lizing. Kjo është montimi i një marke financiare të njohshme nën një çati, me sigurimet si copëza e fundit.

Dhe një Bord i ri

Me ndryshimin e pronësisë dhe emrit u zgjodh edhe përbërja e re e Bordit të drejtorëve. Kryetar është prof. dr. Zoran Ivanovski, anëtar joekzekutiv është prof. dr. Marko Andonov, ndërsa anëtar ekzekutiv është mr. Aleksandar Anevski.

Çfarë do të thotë për tregun

Tregu maqedonas i sigurimeve është i vogël dhe shumica e lojtarëve në të tashmë janë në pronësi të huaj - sllovene, austriake, serbe, kroate. Edhe një kompani vendase që kalon në një grupacion rajonal nuk është kthesë, por vazhdim i një trendi.

Zhvendosja e selisë nga Manastiri në Shkup është pjesë e së njëjtës logjikë dhe është më interesante seç duket. Çdo zhvendosje e tillë do të thotë vende pune, tatime dhe vendimmarrje që shpërngulen nga brendia në kryeqytet - në heshtje, pa komunikatë, si detaj administrativ në një regjistër.

Për klientët, për momentin, ndryshon vetëm emri në policë. Pjesa tjetër - çmimet, kushtet, shpejtësia e pagesës - do të shihet kur të vijë dëmshpërblimi i parë më i madh nën emrin e ri.