LSDM-ja opozitare kritikoi qeverinë e kryeministrit Hristijan Mickoski për mungesën e masave mbrojtëse për qytetarët në prag të festave të Pashkëve, kur shpenzimet e familjeve janë tradicionalisht më të larta.

Sipas njoftimit të partisë, çmimet e produkteve ushqimore bazë janë rritur në mënyrë drastike. Mishi i qengjit ka arritur 700 denarë për kilogram, vezët dhe vaji i ullirit janë shtrenjtuar, ndërsa domatet shiten mbi 200 denarë për kilogram. Frutat dhe perimet në përgjithësi shënojnë rritjen më të madhe të çmimeve.

LSDM-ja pretendon se ka ofruar zgjidhje konkrete disa javë më parë, përfshirë uljen e çmimeve të karburantit dhe ushqimit, por qeveria i ka injoruar ato. Partia akuzoi kryeministrin se i ka lënë qytetarët vetëm të përballen me çmimet e larta në periudhën kur buxhetet familjare janë nën presionin më të madh.

Nga partia kërkuan ndërhyrje urgjente të qeverisë në vend të shtyrjes së masave pas festave, duke i vlerësuar politikat ekonomike të pushtetit si të vonuara, të pamjaftueshme dhe të gabuara.

Edhe Levica iu bashkua kritikave, duke thënë se çmimet e Pashkëve janë dëshmi se populli nuk mund të mbijetojë më. Partia theksoi se mbi 30 përqind e popullsisë jeton nën pragun e varfërisë, ndërsa një pjesë e madhe e qytetarëve detyrohet të marrë hua nga zyrat e kreditit me interesa të larta për të siguruar nevojat bazë. Levica kërkoi kufizimin e marzhave të fitimit në produktet bazë, uljen e TVSH-së për ushqimet dhe forcimin e kontrollit inspektues.