Kryeministri i ri hungarez Peter Magyar deklaroi publikisht se Hungaria nuk do të jetë "deponi për kriminelë të kërkuar ndërkombëtarisht" - dhe e përmendi Nikola Gruevskin me emër. Pyetja është e thjeshtë: sa pasaporta ka njeriu, dhe pse askush nga Shkupi nuk pyet?

Sipas LSDM-së, Gruevski veç posedon pasaportë hungareze dhe serbe pranë asaj maqedonase. Konfirmim zyrtar nuk ka, por nëse është e saktë - ekstradimi bëhet labirint ligjor pa dalje. Shumica e vendeve nuk i ekstradojnë qytetarët e vet, dhe Hungaria nuk është përjashtim.

Ligji hungarez i shtetësisë kërkon tetë vjet qëndrim, por për persona me azil politik afati shkurtohet në tre. Gruevski iku në nëntor 2018 - llogaria nuk është e vështirë.

Portali hungarez me ndikim Telex konfirmon: për Gruevskin nuk ka urdhër-arrest ndërkombëtar nga Interpoli. Kërkesa e mëparshme për ekstradim nga Maqedonia ka skaduar - dhe askush nuk ka dërguar të re. Qeveria e Mickoskit, që pretendon publikisht se Gruevski do të përfundonte në burg nëse paraqitej në kufi, nuk ka ndërmarrë asnjë hap konkret ligjor.

Tri dënime, zero veprime

Gruevski është dënuar me gjithsej dhjetë vjet burg në dy raste të ndara korrupsioni dhe akuzohet për përgjim masiv. Por pa kërkesë aktive për ekstradim dhe pa urdhër-arrest të Interpolit, autoritetet hungareze nuk kanë bazë ligjore për të vepruar.

Eksperti ndërkombëtar ligjor Tamás Hoffman shpjegon se azili mund të revokohet nëse vlerësimi fillestar rezulton i pasaktë. Por për këtë nevojitet iniciativë - nga Shkupi ose nga Budapesti. Deri tani, asnjëra palë nuk lëviz.

Magyar përmendi edhe dy funksionarët polakë - Zbigniew Ziobro me 26 akuza dhe Marcin Romanowski me 11 - të cilët gjithashtu morën azil nën Orban. Dallimi? Për Romanowskin ekziston urdhër-arrest aktiv. Për Gruevskin - asgjë.

Opozita pretendon se pushteti qëllimisht lë hapësirë për mbrojtjen e Gruevskit. Pushteti pretendon se drejtësia do të fitojë. Dhe Gruevski hesht në Facebook - që është, në vetvete, përgjigja më e zëshme.