Në orën 12:04 në Numrin unik për thirrje urgjente 112 mbërriti njoftimi për një person të lënduar në terren të paarritshëm mbi Liqenin e Vogël, nën antenat e Pelisterit. Burri kishte thyerje në të dyja kërcinjtë, ishte me vetëdije, por gjatë lëvizjes edhe gjakosej.

Nga ai moment deri kur mjeku qëndroi pranë tij, kaluan rreth një orë e gjysmë.

Si u zgjidh

Menjëherë pas pranimit të njoftimit, përmes qendrës rajonale për menaxhimin e krizave në Manastir u njoftuan të gjitha shërbimet kompetente: Ndihma e shpejtë mjekësore, SPB Manastir, Drejtoria për mbrojtje dhe shpëtim, njësia territoriale zjarrfikëse dhe Parku Kombëtar „Pelister”. Ekipi i DMSH Manastir u nis drejt të lënduarit, ndërkohë lëvizte edhe ekipi i Parkut Kombëtar.

Në orën 13:45 dy ekipet u takuan te vendi i quajtur Shtëpia e Gjuetarëve, ku mjeku i Ndihmës së shpejtë mjekësore të Manastirit i dha ndihmë mjekësore të lënduarit. Më pas ai u transportua deri te Infoqendra e Pelisterit, e prej andej me ekipin e Ndihmës së shpejtë deri në Spitalin Klinik në Manastir. Me automjet fushor, sepse me tjetër nuk arrihet deri atje.

Qendra për menaxhimin e krizave e koordinoi ndërhyrjen dhe mbeti në komunikim me të gjitha shërbimet deri në përfundimin e plotë të transportit.

Ajo që këtu funksionoi

Vlen të thuhet qartë, sepse rrallë thuhet: ky është një shembull ku sistemi funksionoi. Thirrje në 112, koordinim, dy ekipe të dërguara nga dy anë, takim në vend të caktuar, mjek në terren, transport deri në spital. Pa improvizim dhe pa pritje.

Pelisteri nuk është mal i ulët për shëtitje nëpër shteg të shënuar - Liqeni i Vogël është nën majë, terreni është gur, ndërsa mes infoqendrës dhe vendit të aksidentit nuk ka asgjë që i ngjan rruge. Një burrë me të dyja kërcinjtë e thyer në një vend të tillë nuk mund të zbresë vetë, e as nuk mund të bartet shpejt.

Pyetja që mbetet nuk është për këtë aksion, por për të ardhshmin: sa ekipe të tilla ka shteti, në sa parqe dhe në sa male mund të jenë njëkohësisht? Sepse asnjë nga këta shpëtimtarë nuk është atje me orar të plotë pune për shpëtim në mal - janë njerëz të caktuar për punë tjetër, që në orën 12:04 u nisën përpjetë.

Kur një aksion ka sukses, gjëja më e keqe që mund të bëjmë është të konkludojmë se problemi u zgjidh.